[ریکارڈز] سب سے کم اننگز میں 4 ہزار رنز

بھارت کے نوجوان بلے باز ویراٹ کوہلی رانچی کے جھاڑکھنڈ کرکٹ ایسوسی ایشن اسٹیڈیم میں ہونے والے اولین بین الاقوامی مقابلے میں نہ صرف مردِ میدان قرار پائے بلکہ انہوں نے اپنے ایک روزہ کیریئر کا ایک اہم سنگ میل بھی عبور کیا۔ وہ محض 96 میچز میں 4 ہزار رنز بنا کر اس سنگ میل کو عبور کرنے والے تاریخ میں دوسرے تیز ترین بلے باز بن گئے ہیں۔

ویراٹ کوہلی نے اپنے کیریئر کا آغاز 18 اگست 2008ء میں کیا تھا اور ساڑھے چار سال کے عرصے میں صرف 96 میچز کی 93 اننگز میں انہوں نے 4 ہزار رنز کو جا لیا ہے۔ جو ویسٹ انڈیز کے عظیم سر ویوین رچرڈز کے بعد ایک روزہ کرکٹ تاریخ میں سب سے کم مقابلوں میں 4 ہزار رنز بنانے کا ریکارڈ ہے۔

سر ویوین رچرڈز نے صرف 88 اننگز میں یہ کارنامہ انجام دیا تھا۔ انہوں نے یہ ریکارڈ اپریل 1985ء میں نیوزی لینڈ کے خلاف بنایا اور آج 28 سال گزر جانے کے باوجود، سوائے کوہلی کے، کوئی بلے باز اُن کے اس ریکارڈ کے قریب بھی نہیں پھٹک پایا۔

کوہلی تاریخ کے محض تیسرے کھلاڑی بھی بنے ہیں جنہوں نے 4 ہزار رنز کے لیے 100 سے کم اننگز کھیلی ہيں۔ قبل یہ اعزاز صرف ویو رچرڈز اور ان کے ہم وطن گورڈن گرینج کے ہی پاس تھا۔

24 سالہ کوہلی نے بین الاقوامی کیریئر کا آغاز سے اب تک پیچھے مڑ کر نہیں دیکھا۔عالمی کرکٹ کے بیشتر ماہرین انہیں مستقبل کا عظیم کھلاڑی قرار دے رہے ہیں اور اب تک کوہلی نے اپنی کارکردگی کے ذریعے ثابت بھی کیا ہے۔ محض 96 میچز میں وہ 50.35 کے اوسط سے 4028 رنز بنا چکے ہیں اورسب سے حیران کن بات، 13 سنچریاں اور 22 نصف سنچریاں! واضح رہے کہ سر ویوین رچرڈز کی پورے کیریئر میں 11 سنچریاں تھیں۔ جبکہ ان کا نصف سنچریوں کو سنچریوں میں بدلنے کا ریکارڈ بھی کئی ماہرین کے لیے حیران کن ہے۔

اب دیکھنا یہ ہے کہ کیا آنے والے دنوں میں ویراٹ اس کارکردگی کو جاری رکھ پائیں گے؟

سب سے کم اننگز میں 4 ہزار رنز مکمل کرنے والے کھلاڑی

نام	ملک	بمقابلہ	بمقام	بتاریخ	کیریئر آغاز	مقابلے	اننگز
ویوین رچرڈز		نیوزی لینڈ	البیون	14 اپریل 1985ء	7 جون 1975ء	96	88
ویراٹ کوہلی		انگلستان	رانچی	19 جنوری 2013ء	18 اگست 2008ء	96	93
گورڈن گرینج		انگلستان	لیڈز	21 مئی 1998ء	11 جون 1975ء	97	96
برائن لارا		نیوزی لینڈ	پورٹ آف اسپین	30 مارچ 1996ء	9 نومبر 1990ء	101	100
ڈین جونز		نیوزی لینڈ	ملبورن	11 دسمبر 1990ء	30 جون 1984ء	104	102
سارو گانگلی		سری لنکا	کولمبو	29 اگست 1999ء	11 جنوری 1992ء	110	105
ابراہم ڈی ولیئرز		پاکستان	دبئی	8 نومبر 2010ء	2 فروری 2005ء	109	105
روڈنی مارش		ویسٹ انڈیز	سڈنی	18 دسمبر 1991ء	14 جنوری 1986ء	107	106
گریم اسمتھ		آئرلینڈ	پروویڈنس	3 اپریل 2007ء	30 مارچ 2002ء	109	107
گراہم گوچ		پاکستان	ناٹنگھم	20 اگست 1992ء	26 اگست 1976ء	110	108
نووجوت سنگھ سدھو		پاکستان	شارجہ	14 اگست 1997ء	9 اکتوبر 1987ء	116	109
ڈیسمنڈ ہینز		پاکستان	پرتھ	30 دسمبر 1986ء	22 فروری 1978ء	111	110
گیری کرسٹن		نیوزی لینڈ	برمنگھم	10 جون 1999ء	14 دسمبر 1993ء	110	110
یوسف یوحنا (محمد یوسف)		زمبابوے	ہرارے	یکم دسمبر 2002ء	28 مارچ 1998ء	116	110
میتھیو ہیڈن		بنگلہ دیش	مانچسٹر	25 جون 2005ء	19 مئی 1993ء	114	110