الوداع محمد یوسف!

ٹیسٹ میں سب سے زیادہ رنز بنانے والے پاکستانی بلے بازوں میں دوسرا اور ون ڈے میں تیسرا مقام، سال میں سب سے زیادہ ٹیسٹ رنز کا ریکارڈ، سال میں سب سے زیادہ سنچریاں، 52.29 کا شاندار اوسط اور 24 ٹیسٹ سنچریاں اور 4 ڈبل سنچریاں، یہ ہیں محمد یوسف، جنہوں نے آج بالآخر دنیائے کرکٹ کو خیرباد کہنے کا اعلان کر دیا۔ یوسف کا کہنا ہے کہ اب ان کی توجہ کوچنگ پر ہوگی۔

یوسف کے ساتھ ہی پاکستان کی کرکٹ تاریخ کا ایک اہم باب بند ہوا (تصویر: AP)

یوسف کے ساتھ ہی پاکستان کی کرکٹ تاریخ کا ایک اہم باب بند ہوا (تصویر: AP)

1998ء میں بحیثیت یوسف یوحنا اپنے کیریئر کا آغاز کرنے والے اس بلے باز نے 90 ٹیسٹ میچز میں پاکستان کی نمائندگی کی اور 7530 رنز کے ساتھ ملک کی جانب سے سب سے زیادہ رنز بنانے والے سرفہرست تین کھلاڑیوں میں شامل ہوئے۔ یوسف نے قومی کرکٹ ٹیم میں اپنا مقام مضبوط کرنے کے بعد 2005ء میں عیسائیت چھوڑ کر اسلام قبول کیا اور اس کے ساتھ ہی ان کی کارکردگی میں معجزاتی تبدیلی رونما ہوئی۔

انہوں نے 2006ء میں ایسی شاندار بلے بازی دکھائی کہ دہائیوں سے کوئی بلے باز ایسے تسلسل کے ساتھ کارکردگی پیش نہیں کر پایا تھا۔ 11ٹیسٹ میچز میں 99.33 کے اوسط انہوں نے 1788رنز بنائے اور عظیم بلے باز سر ویوین رچرڈز کا 30 سال پرانا ریکارڈ اپنے نام کیا۔ انہوں نے سال میں سب سے زیادہ سنچریاں بنانے کا نیا ریکارڈ بھی بنایا جن کی تعداد 9 تھی۔ اسی کارکردگی کی بنیاد پر آپ کو آئی سی سی ٹیسٹ پلیئر آف دی ایئر کا اعزاز بھی ملا اور وزڈن نے آپ کو سال کے بہترین کھلاڑیوں میں بھی شمار کیا۔ بعد ازاں 2011ء میں حکومت پاکستان نے تمغہ حسن کارکردگی سے بھی نوازا۔

دوسری جانب ون ڈے کرکٹ میں محمد یوسف 10 ہزار رنز اور 300 مقابلوں کے سنگ میل کے بہت قریب پہنچ کر بھی محروم رہ گئے۔ ان کے ایک روزہ رنز 9720 ہیں جبکہ مقابلے 288۔ 15 سنچریوں کے ساتھ وہ سعید انور کے بعد پاکستان کی جانب سے سب سے زیادہ ون ڈے سنچریاں اور 64 نصف سنچریوں کے ساتھ انضمام الحق کے بعد پاکستان کی جانب سے سب سے زیادہ نصف سنچریاں بنانے والے بلے باز رہے۔

2009-10ء کا مایوس کن دورۂ آسٹریلیا، اس کے بعد بورڈ کے ساتھ تنازع، تاحیات پابندی اور انڈین کرکٹ لیگ میں شمولیت کے معاملے ایسے تنازعات پیدا کر گئے، جنہوں نے اس مرد درویش کے کرکٹ کیریئر کا خاتمہ کر دیا۔

38 سالہ محمد یوسف کی ریٹائرمنٹ پاکستان میں اک عہد کاخاتمہ ہے، کیونکہ ایسا خوبصورت انداز رکھنے والے بلے باز پاکستان کی تاریخ میں شاذونادر ہی ملتے ہیں۔

کرک نامہ نے محمد یوسف کی گزشتہ سالگرہ پر ان کے کیریئر کا بھرپور جائزہ پیش کیا تھا، یہ تحریر اس لنک پر ملاحظہ کیجیے۔

سال میں سب سے زیادہ رنز بنانے والے بلے باز

نام ملک سال مقابلے اننگز رنز بہترین اسکور اوسط سنچریاں نصف سنچریاں چوکے چھکے
محمد یوسف پاکستان 2006 11 19 1788 202 99.33 9 3 222 12
ویوین رچرڈز ویسٹ انڈیز 1976 11 19 1710 291 90.00 7 5 179+ 7
گریم اسمتھ جنوبی افریقہ 2008 15 25 1656 232 72.00 6 6 215 4
سچن تنڈولکر بھارت 2010 14 23 1562 214 78.10 7 5 181 10
رکی پونٹنگ آسٹریلیا 2005 15 28 1544 207 67.13 6 6 178 11
رکی پونٹنگ آسٹریلیا 2003 11 18 1503 257 100.20 6 4 180 7
مائیکل وان انگلستان 2002 14 26 1481 197 61.70 6 2 186 11
جسٹن لینگر آسٹریلیا 2004 14 27 1481 215 54.85 5 4 172 10
وریندر سہواگ بھارت 2008 14 27 1462 319 56.23 3 6 181 22
وریندر سہواگ بھارت 2010 14 25 1422 173 61.82 5 8 215 10

Facebook Comments