[ریکارڈز] ٹی ٹوئنٹی کی سب سے بڑی انفرادی اننگز

آسٹریلیا کے آرون فنچ نے گزشتہ شب انگلستان کے خلاف پہلے ٹی ٹوئنٹی مقابلے میں 63 گیندوں پر 156 رنز کی دھواں دار باری کھیلی جو ٹی ٹوئنٹی بین الاقوامی کرکٹ کی تاریخ کی سب سے طویل اننگز تھی۔

آرون فنچ نے سب سے بڑی ٹی ٹوئنٹی اننگز کا برینڈن میک کولم کا ریکارڈ توڑا (تصویر: Getty Images)

آرون فنچ نے سب سے بڑی ٹی ٹوئنٹی اننگز کا برینڈن میک کولم کا ریکارڈ توڑا (تصویر: Getty Images)

ساؤتھمپٹن میں ہونے والے اس مقابلے کو "آرون فنچ شو" کہنا بے جا نہ ہوگا کیونکہ جس بے رحمی سے اور جتنی دیر تک انہوں نے انگلش باؤلرز کی درگت بنائی، ایسا نظارہ بہت کم دیکھنے کو ملتا ہے۔ آرون کی اننگز میں 14 شاندار چھکے اور 11 چوکے شامل تھے۔ انہوں نے جس پہلی گیند کا سامنا کیا، وہ بھی چھکے کو روانہ کی، پھر نصف سنچری بھی چھکے کی مدد سے بنائی اور پھر سنچری بھی۔ وہ 18 ویں اوور میں جا کر آؤٹ ہوئے جب آسٹریلیا کا اسکور 226 رنز تک پہنچ چکا تھا۔ بعد ازاں آسٹریلیا نے مقررہ 20 اوورز میں 248 رنز بنائے اور انگلستان کو 209 رنز تک محدود رکھ کر مقابلہ 39 رنز سے جیت لیا۔

اس اننگز کے دوران آرون نے ٹی ٹوئنٹی کی طویل ترین اننگز کا ریکارڈ قائم کیا جو ان سے قبل نیوزی لینڈ کے برینڈن میک کولم کے پاس تھا۔ جنہوں نے 21 ستمبر 2012ء کو بنگلہ دیش کے خلاف پالی کیلے، سری لنکا میں 58 گیندوں پر 123 رنز بنائے تھے۔ ورلڈ ٹی ٹوئنٹی کے اس گروپ میچ میں نیوزی لینڈ نے باآسانی کامیابی حاصل کی۔

ہم ذیل میں ٹی ٹوئنٹی کرکٹ کی طویل ترین اننگز کے اعدادوشمار پیش کر رہے ہیں، ملاحظہ کیجیے:

ٹی ٹوئنٹی بین الاقوامی کرکٹ کی سب سے بڑی انفرادی اننگز

بلے باز ملک رنز گیندیں چوکے چھکے اسٹرائیک ریٹ بمقابلہ میدان بتاریخ
آرون فنچ آسٹریلیا 156 63 11 14 247.61 انگلستان ساؤتھمپٹن 29 اگست 2013ء
برینڈن میک کولم نیوزی لینڈ 123 58 11 7 212.06 بنگلہ دیش پالی کیلے 21 ستمبر 2012ء
رچرڈ لیوی جنوبی افریقہ 117* 51 5 13 229.41 نیوزی لینڈ ہملٹن 19 فروری 2010ء
کرس گیل ویسٹ انڈیز 117 57 7 10 205.26 جنوبی افریقہ جوہانسبرگ 11 ستمبر 2007ء
برینڈن میک کولم نیوزی لینڈ 116* 56 12 8 207.14 آسٹریلیا کرائسٹ چرچ 28 فروری 2010ء
تلکارتنے دلشان سری لنکا 104* 57 12 5 182.45 آسٹریلیا پالی کیلے 6 اگست 2011ء
مارٹن گپٹل نیوزی لینڈ 101* 69 9 6 146.37 جنوبی افریقہ ایسٹ لندن 23 دسمبر 2012ء
سریش رینا بھارت 101 60 9 5 168.33 جنوبی افریقہ گروس آئی لیٹ 2 مئی 2010ء
مہیلا جے وردھنے سری لنکا 100 64 10 4 156.25 زمبابوے پروویڈنس 3 مئی 2010ء
رچی بیرنگٹن اسکاٹ لینڈ 100 58 10 5 172.41 بنگلہ دیش دی ہیگ 24 جولائی 2012ء

Facebook Comments