[ریکارڈز] احمد شہزاد، ٹی ٹوئنٹی میں سنچری بنانے والے پہلے پاکستانی
احمد شہزاد نے ورلڈ ٹی ٹوئنٹی 2014ء کے اہم مقابلے میں بنگلہ دیش کے خلاف 111 رنز کی یادگار اننگز کھیل کر نہ صرف پاکستان کو ایک بڑے مجموعے تک پہنچایا بلکہ بین الاقوامی ٹی ٹوئنٹی کرکٹ میں سنچری بنانے والے پہلے پاکستانی بلے باز بھی بن گئے۔
پاکستان کی جانب سے بین الاقوامی ٹی ٹوئنٹی میں طویل ترین اننگز کھیلنے کا گزشتہ ریکارڈ بھی احمد شہزاد ہی کے پاس تھا جنہوں نے گزشتہ سال اگست میں زمبابوے کے خلاف ہرارے کے میدان پر 98 رنز کی ناقابل شکست اننگز کھیلی تھی۔
بنگلہ دیش میں جاری ورلڈ ٹی ٹوئنٹی کے ابتدائی دونوں مقابلوں میں ناکامی کا منہ دیکھنے والے احمد نے تمام کسریں بنگلہ دیشی باؤلرز سے نکالیں۔ صرف 62 گیندوں پر 5 چھکوں اور 10 چوکوں سے مزید 111 رنز کی یہ دھواں دار اننگز مدتوں یاد رکھی جائے گی۔
ٹورنامنٹ میں یہ ایلکس ہیلز کی سری لنکا کے خلاف دھواں دار اننگز کے بعد دوسری سنچری ہے۔ یہ بھی کسی بھی انگریز بلے باز کی جانب سے بنائی گئی تہرے ہندسے کی پہلی اننگز تھی۔ پاکستان کے عمر اکمل آسٹریلیا کے خلاف گزشتہ مقابلے میں اس سنگ میل کے بہت قریب پہنچے تھے لیکن 94 رنز بنانے کے بعد باؤنڈری لائن پر دھر لیے گئے اور یوں یہ انوکھا اعزاز آج احمد شہزاد کے لیے چھوڑ گغے۔
ٹی ٹوئنٹی بین الاقوامی کرکٹ کی تاریخ میں سب سے بڑی انفرادی اننگز کھیلنے کا اعزاز آسٹریلیا کے آرون فنچ کو حاصل ہے جنہوں نے گزشتہ سال اگست میں انگلستان کے حلاف ساؤتھمپٹن میں 156 رنز کی باری کھیلی تھی۔ صرف 63 گیندوں پر ریکارڈ 14 چھکوں اور 11 چوکوں سے مزین اس انںگز کو فی الحال کہیں سے کوئی خطرہ نظر نہیں آتا۔
بہرحال، ذیل میں ہم قارئین کے لیے پاکستان کی جانب سے ٹی ٹوئنٹی کرکٹ میں طویل ترین انفرادی اننگز کھیلنے والے بلے بازوں کے اعدادوشمار پیش کررہے ہیں، امید ہے قارئین کی معلومات میں اضافہ کریں گے۔
ٹی ٹوئنٹی بین الاقوامی میں پاکستانی بلے بازوں کی طویل ترین انفرادی اننگز
بلے باز | ملک | رنز | گیندیں | چوکے | چھکے | بمقابلہ | بمقام | بتاریخ |
---|---|---|---|---|---|---|---|---|
احمد شہزاد | پاکستان | 111* | 62 | 10 | 5 | بنگلہ دیش | ڈھاکہ | 30 مارچ 2014ء |
احمد شہزاد | پاکستان | 98* | 64 | 6 | 6 | زمبابوے | ہرارے | 24 اگست 2013ء |
عمر اکمل | پاکستان | 94 | 54 | 9 | 4 | آسٹریلیا | ڈھاکہ | 23 مارچ 2014ء |
مصباح الحق | پاکستان | 87* | 53 | 3 | 5 | بنگلہ دیش | کراچی | 20 اپریل 2008ء |
محمد حفیظ | پاکستان | 86 | 51 | 9 | 4 | جنوبی افریقہ | سنچورین | 3 مارچ 2013ء |
سلمان بٹ | پاکستان | 74 | 56 | 6 | 3 | کینیڈا | کنگ سٹی | 10 اکتوبر 2008ء |
کامران اکمل | پاکستان | 73 | 55 | 8 | 1 | بنگلہ دیش | گروس آئی لیٹ | یکم مئی 2010ء |
سلمان بٹ | پاکستان | 73 | 46 | 8 | 2 | بنگلہ دیش | گروس آئی لیٹ | یکم مئی 2010ء |
عمران نذیر | پاکستان | 72 | 36 | 9 | 3 | بنگلہ دیش | پالی کیلے | 25 ستمبر 2012ء |
محمد حفیظ | پاکستان | 71 | 48 | 6 | 3 | زمبابوے | ہرارے | 16 ستمبر 2011ء |