میک کولم کی طوفانی اننگز، وسیم اکرم کا ریکارڈ بال بال بچ گیا

شارجہ میں برینڈن میک کولم کی طوفانی اننگز نے کئی ریکارڈز کو خطرے میں ڈالا لیکن کسی بڑے اور اہم ریکارڈ کو نقصان دیے بغیر ڈبل سنچری کے ساتھ مکمل ہوگئی۔ نہ وہ تیز ترین ڈبل سنچری کا ریکاڈ توڑ سکے اور نہ ہی ایک اننگز میں سب سے زیادہ چھکوں کا ریکارڈ کہ جو پاکستان کے سابق کپتان وسیم اکرم کے پاس ہے۔

پاکستا ن کے 351 رنز کے جواب میں کپتان میک کولم کی 202 رنز کی اننگز نیوزی لینڈ کو صرف دو وکٹوں کے نقصان پر اس مجموعے تک لے آئی ہے اور اب بلیک کیپس ایک بڑی برتری حاصل کرنے کے لیے کوشاں ہیں۔ میک کولم نے صرف 188 گیندوں پر 21 چوکوں اور 11 چھکوں کی مدد سے 202 رنز کی ایک یادگار اننگز کھیلی جس میں انہوں نے یاسر شاہ کو ایک زبردست چھکا رسید کرکے اپنی چوتھی ڈبل سنچری مکمل کی اور اسی اوور میں بولڈ ہو کر پویلین بھی سدھار گئے۔

میک کولم کی اننگز میں 11 چھکے کسی بھی ٹیسٹ اننگز میں لگائے گئے چھکوں کی دوسری سب سے زیادہ تعداد ہے۔ یہ ریکارڈ اس وقت پاکستان کے سابق کپتان وسیم اکرم کے پاس ہے جنہوں نے اکتوبر 1996ء میں شیخوپورہ کے مقام پر زمبابوے کے خلاف اپنی یادگار ڈبل سنچری اننگز میں 12 چھکے لگائے تھے۔

وسیم اکرم، جو ایک باؤلر کی حیثیت سے زیادہ مشہور و معروف ہیں، نے اپنی آل راؤنڈ صلاحیتوں کا بہترین اظہار کیا اور 363 گيندوں پر 22 چوکوں اور 12 چھکوں کی مدد سے ناقابل شکست 257 رنز بنائے۔

وسیم اکرم کا اننگز میں سب سے زيادہ چھکے لگانے کا ریکارڈ تین مرتبہ خطرے کی زد میں آ چکا ہے۔ ایک مرتبہ جب نیوزی لینڈ کے ناتھن آسٹل نے مارچ 2002ء میں انگلستان کے خلاف ناقابل یقین ڈبل سنچری اننگز کھیلی تھی اور ایک مرتبہ اکتوبر 2003ء میں میتھیو ہیڈن کی تاریخی 380 رنز کی اننگز کے دوران، جنہوں نے اپنی باریوں میں 11، 11 چھکے لگائے تھے۔ البتہ اس ریکارڈ کو سب سے زيادہ خطرہ آج برینڈن میک کولم سے درپیش تھا جو تین گیندوں پر دو چھکے لگا کر اپنی ڈبل سنچری مکمل کرچکے تھے لیکن عالمی ریکارڈ برابر کرنے سے صرف ایک چھکے کے فاصلے پر کھڑے رہ گئے۔

ذیل میں آپ ایک اننگز میں سب سے زیادہ چھکے لگانے والے بلے بازوں کی فہرست ملاحظہ کرسکتے ہیں:

ایک اننگز میں سب سے زیادہ چھکے لگانے والے بلے باز

بلے باز	ملک	رنز	گیندیں	چوکے	چھکے	بمقابلہ	بمقام	بتاریخ
وسیم اکرم	پاکستان	257*	363	22	12	زمبابوے	شیخوپورہ	اکتوبر 1996ء
ناتھن آسٹل	نیوزی لینڈ	222	168	28	11	انگلستان	کرائسٹ چرچ	مارچ 2002ء
میتھیو ہیڈن	آسٹریلیا	380	437	38	11	زمبابوے	پرتھ	اکتوبر 2003ء
برینڈن میک کولم	نیوزی لینڈ	202	188	21	11	پاکستان	شارجہ	نومبر 2014ء
والی ہیمنڈ	انگلستان	336*	-	34	10	نیوزی لینڈ	آکلینڈ	مارچ 1933ء
کرس کیرنز	نیوزی لینڈ	120	96	10	9	زمبابوے	آکلینڈ	جنوری 1996ء
انضمام الحق	پاکستان	329	436	38	9	نیوزی لینڈ	لاہور	مئی 2002ء
ٹم ساؤتھی	نیوزی لینڈ	77*	40	4	9	انگلستان	نیپئر	مارچ 2008ء
کرس گیل	ویسٹ انڈیز	333	437	34	9	سری لنکا	گال	نومبر 2010ء