پاکستان سپر لیگ کی پہلی سنچری کا اعزاز شرجیل خان کے نام

پاکستان سپر لیگ کا پورا سیزن گزر گیا لیکن کسی بلے باز نے سنچری نہیں بنائی تھی یہاں تک کہ "سیمی فائنل" میں اسلام آباد یونائیٹڈ کے شرجیل خان صرف 50 گیندوں پر طوفانی سنچری بنا کر پی ایس ایل میں تہرے ہندسے کو چھونے والے پہلے بلے باز بن گئے ہیں۔

دبئی میں پشاور زلمی کے کپتان شاہد آفریدی نے ٹاس جیت کر پہلے اسلام آباد کو بیٹنگ کی دعوت دی۔ لیگ کی سب سے مضبوط باؤلنگ لائن کے خلاف سوائے شرجیل خان کے اسلام آباد کا کوئی بیٹسمین نہ چلا، لیکن آج وہ اکیلے ہی کافی دکھائی دیے۔ انہوں نے شاہد آفریدی کے ہر غلط فیصلے کا پورا پورا فائدہ اٹھایا اور صرف 28 ویں گیند پر "لالا" ہی کو چوکا لگا کر اپنی نصف سنچری مکمل کی اور یہ سنگ میل عبور کرتے ہی انہیں ایک شاندار چھکا بھی جڑ دیا۔ صرف 13 اوورز میں ہی انہوں نے مجموعے کو 108 رنز تک پہنچا دیا وہ بھی اس طرح کہ یونائیٹڈ کی کوئی وکٹ نہیں گری تھی۔ دلچسپ بات یہ ہے کہ دوسرے کنارے پر کھڑے ڈیوین اسمتھ کا اس میں حصہ نہ ہونے کے برابر تھا۔ وہ 37 گیندوں پر صرف 19 رنز بنانے کے بعد آؤٹ ہوئے۔ لیکن شرجیل کو روکنے والا کوئی نہیں تھا 16 ویں اوور میں انہوں نے ایک شاندار چھکے کے ذریعے پی ایس ایل کی تاریخ کی پہلی سنچری مکمل کرلی، صرف 50 گیندوں پر، 6 چھکوں اور 11 چوکوں کی مدد سے۔

شرجیل آخری اوور میں 117 رنز بنانے کے بعد رن آؤٹ ہوئے۔ انہوں نے کل 62 گیندوں کھیلی اور 8 چھکوں کے علاوہ 12 چوکے بھی لگائے۔

اس شاندار اننگز پر نہ صرف انہیں تماشائیوں اور اسلام آباد یونائیٹڈ کے 'ڈگ آؤٹ' سے زبردست داد ملی بلکہ شاہد آفریدی سمیت پشاور زلمی کے کئی کھلاڑیوں نے بھی انہیں اس اننگز پر سراہا۔

اس سے قبل عمر اکمل کی 93 رنز کی اننگز پی ایس ایل کی سب سے بڑی باری تھی۔ لاہور قلندرز کے اہم بلے باز نے 8 فروری کو کوئٹہ گلیڈی ایٹرز کے خلاف صرف 40 گیندوں پر 93 رنز بنائے تھے۔

پاکستان سپر لیگ 2016ء کی سب سے بڑی انفرادی اننگز