"لارڈز کے لارڈ" مصباح کی سنچری ریکارڈز کی نظر میں

لارڈز "کرکٹ کا گھر" کہلاتا ہے اور جو بات اس میدان کی ہے، دنیا میں کسی کی نہیں۔ یہاں سنچری بنانے اور پانچ وکٹیں لینے والے کو ہمیشہ یاد کیا جاتا ہے۔ پاکستان کے کپتان مصباح الحق کی بدقسمتی دیکھیں کہ بین الاقوامی کرکٹ میں 15 سالوں سے موجود ہیں لیکن آج تک لارڈز میں کوئی مقابلہ نہیں کھیل سکے تھے۔ ٹاس جیتا، پہلے بلے بازی سنبھالی اور اس وقت میدان میں اترے جب پاکستان 77رنز پر 3وکٹیں گنوا چکا تھا۔ یہی موقع تھا اور مصباح نے اس کا بھرپور فائدہ اٹھایا اور پہلے ہی جھٹکے میں ایک یادگار سنچری بنائی، اس سے بھی زیادہ یادگار جشن بھی منایا اور ریکارڈ بک میں بھی کئی بار اپنا نام لکھوا لیا۔

لارڈز کے میدان میں گونجتی تالیوں کے دوران مصباح کرکٹ تاریخ میں سب سے زیادہ عمر میں سنچری بنانے والے کپتان بھی بنے۔ مصباح الحق نے اپنی یہ دسویں ٹیسٹ سنچری 42 سال اور 47 دن کی عمر میں بنائی۔ آج تک کوئی کپتان اس عمر کو پہنچ کر تہرا ہندسہ عبور نہیں کر سکا۔ یہ اعزاز اس سے قبل آسٹریلیا کے بوب سمپسن کےپاس تھا کہ جنہوں نے 1978ء میں بھارت کے خلاف ایڈیلیڈ ٹیسٹ میں اس وقت سنچری بنائی تھی جب ان کی عمر 41 سال اور 359 دن تھی۔ انہوں نے ڈیڑھ ماہ قبل ہی ہم وطن واروک آرمسٹرانگ کا 1921ء میں قائم کردہ ریکارڈ توڑا تھا۔

سب سے زیادہ عمر میں سنچری بنانے والے کپتان

بلے باز	رنز	بمقابلہ	بمقام	بتاریخ	عمر
مصباح الحق	110*	انگلستان	لارڈز	جولائی 2016ء	42 سال 47 دن
بوب سمپسن	100	بھارت	ایڈیلیڈ	جنوری 1978ء	41 سال 359 دن
بوب سمپسن	176	بھارت	پرتھ	دسمبر 1977ء	41 سال 316 دن
واورنک آرمسٹرونگ	123*	انگلستان	ملبورن	فروری 1921	41 سال 265 دن
واورنک آرمسٹرونگ	121	انگلستان	ایڈیلیڈ	جنوری 1921ء	41 سال 237 دن
واورنک آرمسٹرونگ	158	انگلستان	سڈنی	دسمبر 1920ء	41 سال 209 دن
مصباح الحق	102	انگلستان	دبئی	اکتوبر 2015ء	41 سال 147 دن

40 سال کا ہندسہ عبور کرنے کے بعد یہ مصباح کی پانچویں سنچری ہے اور آج تک کوئی کپتان عمر کا یہ مرحلہ پار کرنے کے بعد تین سے زیادہ سنچریاں نہیں بنا سکا۔ لیکن اس سے اہم بات یہ ہے کہ کپتان کی حیثیت سے یہ مصباح کی آٹھویں سنچری تھی جس کی بدولت وہ پاکستان کے لیے سب سے زیادہ ٹیسٹ سنچریاں بنانے والے کپتان بن گئے ہیں۔ انضمام الحق نے اپنے کیریئر میں 7 ایسی کیپٹن اننگز کھیلی تھیں، جن میں وہ تہرے ہندسے تک پہنچے تھے۔

اگر سب سے زیادہ عمر میں سنچریاں بنانے والے بلے بازوں کو دیکھیں تو مصباح کی یہ اننگز چھٹے نمبر پر آتی ہے۔ بزرگ ترین سنچورین کا اعزاز انگلستان کے جیک ہوبس کو حاصل ہے جنہوں نے مارچ 1929ء میں آسٹریلیا کے خلاف ملبورن میں 142 رنز کی اننگز اس وقت کھیلی تھی جب ان کی عمر 46 سال اور 82 دن تھی۔ آج 87 سال گزر جانے کے باوجود یہ ریکارڈ جوں کا توں موجود ہے۔ بہرحال، مصباح پاکستان کے لیے سنچری بنانے والے معمر ترین کھلاڑی تو ہیں ہی۔ اس فہرست کے دیگر بلے باز آپ یہاں دیکھ سکتے ہیں:

سب سے زیادہ عمر میں سنچری بنانے والے بلے باز

بلے باز	رنز	بمقابلہ	بمقام	بتاریخ	عمر
جیک ہوبس	142	آسٹریلیا	ملبورن	مارچ 1929ء	46 سال 82 دن
پیٹسی ہینڈرسن	132	آسٹریلیا	مانچسٹر	جولائی 1934ء	45 سال 151 دن
ویرن بارڈسلی	193*	انگلستان	لارڈز	جون 1926ء	43 سال 202 دن
ڈیو نورس	111	آسٹریلیا	جوہانسبرگ	نومبر 1921ء	42 سال 291 دن
فرینک وولی	154	جنوبی افریقہ	مانچسٹر	جولائی 1929ء	42 سال 61 دن
مصباح الحق	110*	انگلستان	لارڈز	جولائی 2015ء	42 سال 47 دن