آسٹریلیا کے شہرۂ آفاق آل راؤنڈر شین واٹسن کی جنوبی افریقہ کے خلاف ایک روزہ سیریز میں شرکت مشکوک ہو گئی ہے جبکہ اہم بلے باز شان مارش بھی زخمی ہو گئے ہیں۔ کرکٹ آسٹریلیا نے کیمرون وائٹ کے احتیاطاً ایک روزہ دستے کے لیے طلب کر لیا ہے۔
کرکٹ آسٹریلیا کے فزیوتھراپسٹ ایلکس کونتورس نے کہا کہ شین واٹسن کولہے کے پٹھے میں کھنچاؤ سے صحت یاب ہو رہے ہیں اور اسی تکلیف کی وجہ سے وہ جنوبی افریقہ کے خلاف دوسرا ٹی ٹوئنٹی نہیں کھیل پائے تھے۔ واٹسن کا علاج جاری ہے اور پہلے ایک روزہ مقابلے سے قبل ان کا جائزہ لیا جائے گا کہ آیا وہ میچ کھیلنے کے لیے مکمل طور پر فٹ ہیں یا نہیں۔
دوسری جانب شان مارش بھی دوسرے ٹی ٹوئنٹی کے دوران اپنا بایاں کندھا زخمی کروا بیٹھے تھے، لیکن کونتورس کے مطابق یہ معمولی قسم کی انجری ہے۔ ان کے تمام اسکین مکمل ہو چکے ہیں، اور ان کی شمولیت کا جائزہ بھی میچ سےقبل لیا جائے گا۔
تاہم حفظِ ما تقدم کے تحت آسٹریلیا نے ٹی ٹوئنٹی دستے کے قائد کیمرون وائٹ کو طلب کر لیا ہے جنہوں نے آخری مرتبہ اپریل میں بنگلہ دیش کے خلاف قومی ٹیم کی نمائندگی کی تھی تاہم ناقص بلے بازی کے باعث دورے کے وسط میں ہی دستے سے باہر کر دیے گئے تھے۔ وہ ایک روزہ مقابلوں کی آخری 10 اننگز میں 24 رنز سے زیادہ کی انفرادی اننگز نہیں کھیل پائے۔
