[ریکارڈز] پہلے ہی ٹیسٹ میں 10 یا زائد وکٹیں لینے والے گیند باز

رواں سال چند ایسے گیند باز عالمی منظرنامے پر ابھرے ہیں جنہوں نے آتے ہی دنیائے کرکٹ میں تہلکہ مچا دیا ہے۔ اور یوں تاریخ میں اپنا نام امر کر لیا ہے۔ بھارت کے روی چندر آشون اور پروین کمار، نیوزی لینڈ کے ڈوگ بریسویل، آسٹریلیا کے پیٹرک کمنز، ناتھن لیون اور جیمز پیٹن سن، پاکستان کے اعزاز چیمہ، جنوبی افریقہ کے ویرنن فلینڈر اور بنگلہ دیش کے الیاس سنی نے پہلے ہی ٹیسٹ میں اننگز میں حریف ٹیم کے 5 سے زائد کھلاڑیوں کو آؤٹ کر کے اپنی آمد کا اعلان کیا۔ اِن میں سے آشون، کمنز اور فلینڈر کی گیند بازی کو زیادہ اہمیت اس لیے حاصل ہوئی کیونکہ انہوں نے اپنی شاندار کارکردگی کے ذریعے ٹیم کی فتح میں کلیدی کردار ادا کیا۔ اس لحاظ سے 2011ء ڈیبوٹنٹ کھلاڑیوں خصوصاً گیند بازوں کے لیے بہت ہی عمدہ سال رہا۔

سال 2011ء میں پہلے ٹیسٹ مقابلے میں 5 سے زائد وکٹیں حاصل کرنے والے گیند باز

نام	ملک	تاریخ	بمقابلہ	بمقام	دیے گئے رنز	حاصل کردہ وکٹیں
روی چندر آشون		نومبر 2011ء	ویسٹ انڈیز	دہلی	128	9
ویرنن فلینڈر		نومبر 2011ء	آسٹریلیا	کیپ ٹاؤن	78	8
اعزاز چیمہ		ستمبر 2011ء	زمبابوے	بلاوایو	103	8
پیٹرک کمنز		نومبر 2011ء	جنوبی افریقہ	جوہانسبرگ	117	7
الیاس سنی		اکتوبر 2011ء	ویسٹ انڈیز	چٹاگانگ	128	7
پروین کمار		جون 2011ء	ویسٹ انڈیز	کنگسٹن، جمیکا	80	6
جیمز پیٹن سن		دسمبر 2011ء	نیوزی لینڈ	برسبین	91	6
ناتھن لیون		اگست-ستمبر 2011ء	سری لنکا	گال	107	6
ڈوگ بریسویل		نومبر 2011ء	زمبابوے	بلاوایو	136	6

ماضی میں کئی گیند باز پہلے ہی ٹیسٹ میں محیر العقول کارنامے انجام دے چکے ہیں لیکن اس فہرست میں دورِ جدید کے گیند باز خال خال ہی ملتے ہیں۔ تو آج ہم ریکارڈز کے سلسلے میں آپ کو کیریئر کے پہلے ٹیسٹ میں شاندار گیند بازی کرنے والے باؤلرز کا احوال بتائیں گے۔

ڈیبیو پر سب سے عمدہ کارکردگی کا اعزاز بھارت کے نریندر ہروانی کے پاس ہے جنہوں نے جنوری 1988ء میں کرکٹ کی تاریخ کی عظیم ترین ٹیموں میں سے ایک ویسٹ انڈیز کے خلاف مدراس ٹیسٹ میں زبردست گیند بازی کرتے ہوئے 16 وکٹیں حاصل کیں اور بھارت کی 255 رنز سے بڑی فتح میں اہم کردار ادا کیا۔ انہوں نے میچ میں 136 رنز دے کر 16 کھلاڑیوں کو اپنا شکار بنایا۔ جن میں پہلی اننگز میں 61 رنز دے کر 8 اور دوسری اننگز میں 75 رنز دے کر اتنی ہی وکٹیں شامل تھیں۔ البتہ ان کا کیریئر بہت زیادہ طویل ثابت نہیں ہوا اور وہ 17 ٹیسٹ مقابلوں میں بھارت کی نمائندگی کر پائے، جس میں مجموعی طور پر 66 وکٹیں اُن کے نام رہیں۔

پاکستان کی جانب سے کیریئر کے پہلے ہی ٹیسٹ میں سب سے زیادہ یعنی 11 وکٹیں حاصل کرنے کا اعزاز 'اسپیڈ مشین' محمد زاہد کے پاس ہے۔ زاہد، جنہیں اس وقت دنیا کا تیز ترین گیند باز مانا جاتا تھا، بدقسمتی سے اپنے ناقص باؤلنگ ایکشن اور تیز سے تیز تر گیند پھینکنے کی کوشش کے باعث کمر کی انجری کا شکار ہو گئے اور صرف 5 ٹیسٹ اور 11 ایک روزہ بین الاقوامی مقابلوں میں پاکستان کی نمائندگی کے بعد ہمیشہ کے لیے دنیائے کرکٹ سے باہر ہو گئے۔ بعد ازاں وہ فرسٹ کلاس کرکٹ میں تو واپس آئے لیکن قومی ٹیم میں پھر جگہ نہ بنا سکے۔

اسی فہرست میں دسمبر 1976ء کا بھارت-انگلستان متنازع دہلی ٹیسٹ کے ڈیبیوٹنٹ انگلستان کے جان لیور بھی شامل ہیں۔ بدنام زمانہ 'ویزلین تنازع' کا باعث بننے والے اس مقابلے کی گونج حال ہی میں بھارت کے حالیہ دورۂ انگلستان میں بھی سنی گئی تھی جب ٹرینٹ برج ٹیسٹ کے دوران ایک مرتبہ پھر 'ویزلین' کا نام کرکٹ میدانوں میں سنا گیا۔ بہرحال، مذکورہ دورے کے دہلی میں کھیلے گئے پہلے ٹیسٹ میں شکست کے بعد بشن سنگھ بیدی نے انگلستان کے نوجوان گیند باز جان لیور پر الزام لگایا تھا کہ انہوں نے غیر معمولی سوئنگ حاصل کرنے کے لیے گیند پر ویزلین ملی اور یوں کیریئر کے پہلے ہی مقابلے میں 10 وکٹیں حاصل کرنے میں کامیاب ہوئے۔ اس ٹیسٹ میں بھارت کو اپنے ہی ہوم گراؤنڈ پر اننگز اور 25 رنز کی ذلت آمیز شکست ہوئی تھی۔ بعد ازاں انگلستان نے 5 مقابلوں کی سیریز بھی 3-1 کے بھاری مارجن سے جیت لی تھی۔

حیران کن طور پر کیریئر کے اتنے شاندار آغاز کے باوجود اس پوری فہرست میں محض چند کھلاڑی ایسے ہیں جنہوں نے طویل ٹیسٹ کیریئر کھیلا جبکہ اکثر ایسے ہیں جن کا کیریئر بہت مختصر رہا۔ بلکہ ان میں سے ایک گیند باز تو ایسے بھی ہیں جن کو کیریئر میں وہی ایک ٹیسٹ کھیلنے کا موقع ملا جس میں انہوں نے 11 وکٹیں حاصل کیں اور وہ ہیں انگلستان کے چارلس میریٹ۔ جبکہ جنوبی افریقہ کے سڈنی برک، انگلستان کے فریڈ مارٹن اور آسٹریلیا کے جیسن کریزا نے صرف 2،2 اور ویسٹ انڈیز کے ہائنز جانسن نے پورے کیریئر میں محض 3 ٹیسٹ مقابلے کھیلے۔ اس فہرست میں صرف کلیری گریمٹ اور سر ایلک بیڈسر ہی ایسے نام ہیں جنہیں لیجنڈ کا درجہ حاصل ہے۔

آئیے اپنے پہلے ہی ٹیسٹ میچ میں 10 یا زائد وکٹیں حاصل کرنے والے گنے چنے گیند بازوں کی فہرست ملاحظہ کرتے ہیں:

ٹیسٹ کیریئر کے پہلے ہی مقابلے میں 10 یا زائد وکٹیں حاصل کرنے والے گیند باز

نام	ملک	تاریخ	بمقابلہ	بمقام	دیے گئے رنز	حاصل کردہ وکٹیں
نریندر ہروانی		جنوری 1988ء	ویسٹ انڈیز	مدراس (موجودہ چنئی)	136	16
باب میسی		جون 1972ء	انگلستان	لارڈز، لندن	137	16
فریڈ مارٹن		اگست 1890ء	آسٹریلیا	اوول، لندن	102	12
جیسن کریزا		نومبر 2008ء	بھارت	ناگ پور	358	12
کلیری گریمٹ		فروری-مارچ 1925ء	انگلستان	سڈنی	82	11
چارلس میریٹ		اگست 1933ء	ویسٹ انڈیز	اوول، لندن	96	11
الفریڈ ہال		جنوری 1923ء	انگلستان	کیپ ٹاؤن	112	11
محمد زاہد		نومبر-دسمبر 1996ء	نیوزی لینڈ	راولپنڈی	130	11
ایلک بیڈسر		جون 1946ء	بھارت	لارڈز، لندن	145	11
سڈنی برک		جنوری 1962ء	نیوزی لینڈ	کیپ ٹاؤن	196	11
الفریڈ ویلنٹائن		جون 1950ء	ویسٹ انڈیز	مانچسٹر	204	11
جان لیور		دسمبر 1976ء	بھارت	دہلی	70	10
ہائنز جانسن		مارچ-اپریل 1948ء	انگلستان	کنگسٹن، جمیکا	96	10
ٹام رچرڈسن		اگست 1893ء	آسٹریلیا	مانچسٹر	156	10
کین فارنس		جون 1934ء	آسٹریلیا	ناٹنگھم	179	10