احمد آباد ٹیسٹ، انگلستان فن کی خدمات سے محروم

گوروں کی سرزمینِ ہند کو فتح کرنے کی دیرینہ تمنا اس مرتبہ بھی مشکلات سے دوچار ہے کیونکہ پے در پے اس کے اہم کھلاڑی زخمی ہو گئے ہیں اور مرکزی باؤلر اسٹورٹ براڈ کے بعد اب انجری کا اگلا نشانہ بنے ہیں اسٹیون فن۔

فن منگل کو تربیتی مشقوں میں حصہ نہیں لے پائے۔ وہ بھارت 'اے' کے خلاف پہلے وارم اپ مقابلے میں محض 4 اوورز کرانے کے بعد باہر چلے گئے تھے اور عملے کی جانب سے ان کی ران کے پٹھوں میں کھنچاؤ کی تشخیص کی گئی تھی۔

گو کہ دونوں گیند بازوں نے اتوار کو تربیتی سیشن میں بھرپور حصہ لیا تھا، لیکن ایسا لگتا ہے کہ مہمان ٹیم کی انتظامیہ دونوں گیند بازوں کو کھلا کر ان پر اضافی دباؤ ڈالنے اور پہلے ٹیسٹ میں ہی کسی مزید بڑی مصیبت میں گرفتار ہونے سے بچنا چاہتی ہے۔

منگل کو پورے سیشن میں اسٹیون فن نے نہ ہی فیلڈنگ میں حصہ لیا اور نہ ہی گیند بازی کی۔ البتہ براڈ نے چند اوورز ضرور پھینکے اور ان کی شرکت تقریباً یقینی ہے۔

فن کی ممکنہ غیر حاضری میں ٹم بریسنن ٹیم میں جگہ پائے گی۔ فن کے مقابلے میں ان کی بلے بازی کی صلاحیت بہت اچھی ہے اور وہ ریورس سوئنگ کی بھی خاصی اہلیت رکھتے ہیں۔

اب دیکھنا یہ ہے کہ 15 نومبر کو احمد آباد میں پہلے ٹیسٹ کے لیے انگلستان کس ٹیم کو میدان میں اتارتا ہے۔