وسیم اور شنیرا کے ولیمے کا اعلان جلد متوقع

1 565

وسیم اکرم نے دس دن بعد اپنے نکاح کے بارے میں تو قوم کو آگاہ کر ہی دیا ہے اور اب سابق کپتان اپنی نئی نویلی دلہن کے ساتھ ولیمے کے بارے میں جلد ہی کراچی میں اعلان کریں گے۔

والد کی طبیعت ناساز ہونے کی وجہ سے وسیم اکرم نے نکاح سادگی سے کیا
والد کی طبیعت ناساز ہونے کی وجہ سے وسیم اکرم نے نکاح سادگی سے کیا

وسیم اکرم کے قریبی ذرائع کا کہنا ہے کہ دونوں نومبر میں کراچی میں ولیمے کی تقریب دھوم دھام سے منعقد کرنا چاہتے ہیں۔ اور نیوز کانفرنس اسی سلسلے کی ایک کڑی ہے جس میں ولیمے سے متعلق تفصیلات دی جائیں گی جبکہ یہ بھی بتایا جائے گا کہ اس ولیمے میں کون کون سی شخصیات کو مدعو کیا جارہا ہے۔

ذرائع کہتے ہیں سابق کپتان کے ولیمے میں ملکی کرکٹرز کے ساتھ ساتھ غیر ملکی کرکٹرز کی بہت بڑی تعداد شرکت کرے گی۔ وسیم اکرم نے لاہور میں سادگی سے نکاح اپنے والد کی خراب طبیعت کے باعث کیا اور یہ نکاح جلد بازی میں ہوا تھا۔

واضح رہے وسیم اکرم نے 12 اگست کو لاہور میں شنیرا کے ساتھ ایک نہایت ہی سادہ سی تقریب میں نکاح کیا جس میں ان کے چند قریبی دوستوں کے علاوہ ان کے اہل خانہ ہی شامل تھے۔

ذرائع یہ بھی دعوی کرتے ہیں کہ شنیرا تھامسن، جنہیں سعید انور نے مسلمان کیا تھا، سابق اوپنر کی جانب سے تحفے میں دی جانے والی مذہبی کتابوں کا مطالعہ بھی کررہی ہیں جبکہ میاں کو قابو میں رکھنے کے لیے مشرقی کھانوں پر بھی عبور حاصل کرنے کے لیے زیادہ وقت کچن میں گزارتی ہیں۔