شعیب اختر ساتھی کھلاڑی سے الجھ پڑے، مغلظات بکیں

0 700

شعیب اختر بین الاقوامی کرکٹ کو تو خیرباد کہہ گئے لیکن آج تک جھگڑالو طبیعت سے چھٹکارہ نہیں پا سکے۔ حال ہی میں ناروے میں ہونے والے ایک نمائشی کرکٹ میچ میں وہ ساتھی کھلاڑی سے الجھ پڑے اور جب معاملہ تلخ کلامی سے آگے بڑھنے لگا تو منتظمین کو مداخلت کر کے انہيں قابو کرنا پڑا۔

نمائشی مقابلے میں شعیب اختر کے علاوہ عبد الرزاق اور عمران نذیر نے بھی شرکت کی (تصویر: Cricnama)
نمائشی مقابلے میں شعیب اختر کے علاوہ عبد الرزاق اور عمران نذیر نے بھی شرکت کی (تصویر: Cricnama)

ناروے میں مقیم پاکستانی برادری کی جانب سے ایک نمائشی مقابلے کا انعقاد کیا گیا تھا جس میں ایک ٹیم کی قیادت شعیب اختر کے پاس تھی جبکہ دوسری ٹیم کے قائد عبد الرزاق تھے۔

مقابلے میں اپنے پانچ اوورز میں 40 رنز کھانے کے باوجود جب شعیب اختر کو کوئی وکٹ نہ ملی تو ناروے سے تعلق رکھنے والے ایک پاکستانی نژاد ساتھی کھلاڑی نے ازراہ مذاق کہہ دیا کہ شعیب بھائی! آپ میں اب پہلے جیسا دم خم نہیں رہا۔ یہ سننا تھا کہ شعیب آگ بگولا ہوگئے اور مغلظات بکنے لگے۔

میدان میں موجود شائقین کا بھی کہنا ہے کہ شعیب کا رویہ صرف میدان ہی میں نہيں بلکہ اس سے باہر بھی انتہائی نازیبا تھا جس کی وجہ سے منتظمین نے بھی شعیب کو تنہا چھوڑ دیا یہاں تک کہ واپسی پر انہیں ایئرپورٹ بھی اکیلے ہی آنا پڑا۔ منتظمین کی جانب سے کوئی فرد انہیں چھوڑنے کے لیے نہیں آیا۔