واٹمور کے جانے سے پہلے ہی معین خان نے ذمہ داریاں سنبھال لیں

0 404

پاکستان کے ہیڈ کوچ ڈیو واٹمور کے عہدے کے برقرار رہنے کی موہوم سی امیدیں بھی جنوبی افریقہ کے خلاف ٹیسٹ سیریز کے نتیجے سے ختم ہوچکی ہیں اور اب ایسا لگتا ہے کہ انہوں نے بھی نوشتہ دیوار پڑھ لیا ہے۔ ٹیم مینیجر معین خان ممکنہ طور پر ان کے جانشیں ہوں گے اور متحدہ عرب امارات میں انہوں نے بتدریج ذمہ داریوں کو سنبھالنا شروع کر دیا ہے۔

معین خان بورڈ سربراہ نجم سیٹھی کی گڈ لسٹ میں سب سے اوپر ہیں (تصویر: Dawn)
معین خان بورڈ سربراہ نجم سیٹھی کی گڈ لسٹ میں سب سے اوپر ہیں (تصویر: Dawn)

سابق کپتان معین خان قومی ٹیم کے تربیتی سیشنز میں ڈیو واٹمور سے زیادہ فعال نظر آ رہے ہیں اور باؤلنگ، بیٹنگ یا فیلڈنگ تینوں میں وہی متحرک نظر آ رہے ہیں۔

اسی طرح موقع شناس کھلاڑیوں نے بھی حالات کو بھانپ لیا ہے، اور وہ ڈیو واٹمور کو نظر انداز کرکے معین خان کی جی حضور کر رہے ہیں۔

ٹیم ذرائع کا کہنا ہے کہ آج کل ٹیم اجلاسوں سے لے کر نیٹ سیشنز اور میچ کی حکمت عملی مرتب کرنے تک، تمام امور میں معین خان حاوی نظر آتے ہیں اور ٹیم کے سینئر کھلاڑی ان سے بہترین تعاون کر رہے ہیں۔

ٹیم کے بعض اراکین معین خان سے اس لیے قربت اختیار کرنا چاہتے کیونکہ ان پر عیاں ہو چکا ہے کہ نجم سیٹھی چاہے عدالت کچہری کے چکروں ہی میں کیوں نہ ہوں، معین خان کی فہرست میں سب سے آگے ہیں اور ٹیم کے آئندہ معاملات کے لیے معین کا ووٹ بہت اہمیت کا حامل ہوگا ۔