[ریکارڈز] ایک مقابلے میں سب سے زیادہ چھکے

کمبھ کے میلے کے بعد بھارت کا دوسرا سب سے بڑا میلہ یعنی 'رنز میلہ' اپنے اختتام کو پہنچا۔ 7 ایک روزہ مقابلوں میں صرف 5 مقابلے ہی مکمل ہو پائے جس میں رنزوں کے انبار لگ گئے۔ کئی ریکارڈ ٹوٹے اور آخری مقابلے میں بھی دھواں دار بلے بازی کا مظاہرہ دیکھنے میں آیا۔ خاص طور پر روہیت شرما کی ڈبل سنچری اننگز نے ہندوستان میں دیوالی کی خوشیوں کو دوبالا کردیا۔

روہیت شرما نے 158 گیندوں پر مشتمل 209 رنز کی اننگز میں ریکارڈ 16 چھکے لگائے جو آج تک دنیا کا کوئی بلے باز کسی ایک روزہ مقابلے کی واحد اننگز میں نہیں لگا سکا۔ روہیت سے قبل یہ ریکارڈ آسٹریلیا کے شین واٹسن کے پاس تھا، جو اس مقابلے میں جارحانہ موڈ میں نظر تو آئے لیکن اپنی انجری اور مقابلہ ہاتھ سے نکل جانے کے باعث بھارت کے لیے کچھ خاص خطرہ ثابت نہ ہو سکے۔

روہیت شرما نے اپنی ڈبل سنچری بھی چھکے کے ذریعے مکمل کی اور یہ چھکا ریکارڈ برابر کرنے کا چھکا تھا اور اگلی ہی گیند کو انہوں نے ایک مرتبہ پھر ڈیپ مڈوکٹ باؤنڈری سے باہر جا پھینکا۔ گو کہ وہ آخری اوور کی تیسری گیند پر آؤٹ ہوگئے لیکن ان دونوں چھکوں نے تاریخ میں ان کا نام امر کردیا ہے۔

شین واٹسن کا گزشتہ ریکارڈ 11 اپریل 2011ء کو بنگلہ دیش کے خلاف ڈھاکہ میں بنایا گیا تھا جب انہوں نے 96 گیندوں پر 185 رنز کی ناقابل شکست باری کھیلی تھی۔ کئی ریکارڈز ان کی اننگز کی زد میں آ گئے تھے لیکن کیونکہ آسٹریلیا بعد میں بیٹنگ کر رہا تھا اور بنگلہ دیش کی جانب سے دیا گیا ہدف بہت زیادہ نہیں تھا، اس لیے کئی ریکارڈز بچ گئے۔

ایک روزہ کرکٹ کی تاریخ میں صرف 11 مواقع ایسے آئے ہیں جب کسی ایک بلے باز نے 10 یا اس سے زیادہ چھکے لگائے ہوں اور کسی کھلاڑی کو ایک سے زیادہ مرتبہ یہ کارنامہ انجام دینے کا موقع نہیں ملا۔

ہم ذیل میں کسی ایک مقابلے میں 10 یا اس سے زیاد ہ چھکے لگانے والے بلے بازوں کی فہرست پیش کر رہے ہیں، امید ہے قارئین کے لیے دلچسپی کا باعث ہوگی:

ایک باری میں سب سے زیادہ چھکے

بلے باز	ملک	رنز	گیندیں	چوکے	چھکے	بمقابلہ	بتاریخ	بمقام
روہیت شرما	بھارت	209	158	12	16	آسٹریلیا	نومبر 2013ء	بنگلور
شین واٹسن	آسٹریلیا	185*	96	15	15	بنگلہ دیش	اپریل 2011ء	ڈھاکہ
زاویئر مارشل	ویسٹ انڈیز	157*	118	11	12	کینیڈا	اگست 2008ء	کنگ سٹی
سنتھ جے سوریا	سری لنکا	134	65	11	11	پاکستان	اپریل 1996ء	سنگاپور
شاہد آفریدی	پاکستان	102	40	6	11	سری لنکا	اکتوبر 1996ء	نیروبی
مہندر سنگھ دھونی	بھارت	183*	145	15	10	سری لنکا	اکتوبر 2005ء	جے پور
مارک باؤچر	جنوبی افریقہ	147*	68	8	10	زمبابوے	ستمبر 2006ء	پوچفیسٹروم
میتھیو ہیڈن	آسٹریلیا	181*	166	11	10	نیوزی لینڈ	فروری 2007ء	ہملٹن
برینڈن میک کولم	نیوزی لینڈ	166	135	12	10	آئرلینڈ	جولائی 2008ء	ابرڈین
عبد الرزاق	پاکستان	109*	72	7	10	جنوبی افریقہ	اکتوبر 2010ء	ابوظہبی
کیرون پولارڈ	ویسٹ انڈیز	119	110	4	10	بھارت	دسمبر 2011ء	چنئی