دنیا کی ہر ٹیم کو ہرانے کی صلاحیت رکھتے ہیں، سری لنکا کو بھی شکست دیں گے: اظہر علی

1 251

جنوبی افریقہ کو اس کی سرزمین پر ون ڈے سیریز میں شکست دینے کے بعد پاکستان نے سری لنکا کو بھی زیر کرلیا ہے اور یوں طویل عرصے کے بعد سخت حریفوں کے خلاف دو مسلسل سیریز جیتی ہیں اور تسلسل کے ساتھ یہی کارکردگی پاکستان کے لیے اگلے سال ایشیا کپ کے دفاع میں معاون ثابت ہوگی۔ براعظمی اعزاز کے لیے جنگ کے آغاز سے قبل پاکستان کو سری لنکا کے خلاف تین ٹیسٹ میچز کھیلنے ہیں اور مڈل آرڈر بیٹسمین اظہر علی کہتے ہیں کہ پاکستانی ٹیم اپنے برے دن گزار چکی ہے اور ٹیسٹ سیريز میں بھی ضرور کامیابی حاصل کرے گی۔

صرف کمزور ٹیموں کے خلاف کامیابیاں حاصل نہیں کی، انگلستان کو بھی ہرایا تھا اور اب جنوبی افریقہ کو بھی شکست دی (تصویر: AFP)
صرف کمزور ٹیموں کے خلاف کامیابیاں حاصل نہیں کی، انگلستان کو بھی ہرایا تھا اور اب جنوبی افریقہ کو بھی شکست دی (تصویر: AFP)

پاک-لنکا ٹیسٹ سیریز کے لیے اسکواڈ میں شامل کیے جانے والے اظہر علی کا کہنا ہ ےکہ کچھ عرصہ قبل پاکستانی ٹیم نے بہت برا وقت گزارا ہے، جنوبی افریقہ کے ہاتھوں کلین سویپ کے بعد زمبابوے جیسےکمزور حریف سے نے بھی اسے ٹیسٹ میں شکست دی لیکن اب پاکستان کرکٹ بورڈ کی بھرپور سپورٹ نے کھلاڑیوں کے حوصلوں کو بلند کیا ہے اور اس کا نتیجہ ہے کہ پاکستان نے فتوحات سمیٹنا شروع کردی ہیں۔

اظہر علی کا کہنا ہے کہ اگر کوئی سمجھتا ہے کہ پاکستان صرف کمزور ٹیموں کے خلاف کامیابیاں حاصل کرتا ہے تو اسے جنوبی افریقہ کے خلاف اسی کے دیس میں ایک روزہ سیریز میں کامیابی اور اس سے قبل انگلستان کے خلاف جبکہ وہ نمبر ون تھا، کلین سویپ فتح کو ذہن نشین کرنا چاہیے، پھر واضح ہوجائے گا کہ پاکستان دنیا کی ہر ٹیم کو ہرانے کی صلاحیت رکھتا ہے۔

آؤٹ آف فارم ہونے کی وجہ سے ٹیم سے باہر ہونے والے اظہر نے کہا کہ گرین شرٹس نے جس طرح سری لنکا کو ون ڈے سیریز میں شکست دی ہے، اس کے بعد کہا جا سکتا ہے کہ قومی ٹیم فتح کی راہ پر گامزن ہوچکی ہے اور ٹیسٹ سیریز میں بھی ضرور کامیاب ہوگی۔

اپنی کارکردگی کے حوالے سے اظہر نے کہا کہ اپنی خامیاں دور کرنے کے لیے میں نے ڈومیسٹک سیزن میں بھرپور محنت کی ہے اور اس دوران وقتاً فوقتاً نیشنل کرکٹ اکیڈمی بھی جاتا رہا ہوں اور اب بہتر کارکردگی دکھا رہا ہوں۔ انہوں نے کہا کہ مجھے یقین ہے کہ سری لنکا کے خلاف ٹیسٹ سیریز میں طویل اننگز کھیلنے میں کامیاب ہوں گا۔

پاکستان اور سری لنکا کے درمیان تین ٹیسٹ میچز کی سیریز کا آغاز 31 دسمبر سے ابوظہبی میں ہو رہا ہے۔