للت مودی کا انتخاب، بی سی سی آئی نے راجستھان پر پابندی لگا دی

0 1,040

بھارتی کرکٹ بورڈ نے تاحیات پابندی کے شکار للت مودی کو کرکٹ ایسوسی ایشن کا صدر بنانے پر راجستھان کو غیر معینہ مدت کے لیے معطل کردیا ہے اور اب ریاستی ایسوسی ایشن کے معاملات عبوری طور پر چلائے جائیں گے۔

راجستھان کرکٹ ایسوسی ایشن نے للت مودی کو صدر بنایا اور کچھ ہی دیر بعد بھارتی کرکٹ بورڈ نے ایسوسی ایشن پر پابندی عائد کردی (تصویر: IPL)
راجستھان کرکٹ ایسوسی ایشن نے للت مودی کو صدر بنایا اور کچھ ہی دیر بعد بھارتی کرکٹ بورڈ نے ایسوسی ایشن پر پابندی عائد کردی (تصویر: IPL)

انڈین پریمیئر لیگ کے بانی کمشنر للت مودی آج ہی بھاری اکثریت سے راجستھان کرکٹ ایسوسی ایشن کے سربراہ منتخب ہوئے تھے۔ ایسوسی ایشن کے انتخابات گزشتہ سال دسمبر میں منعقد ہوئے تھے لیکن عدالت عظمیٰ کے فیصلے کی وجہ سے نتائج کا اعلان روک دیا گیا تھا۔ منگل کو عدالت کے مقرر کردہ مبصر نے جے پور میں ان نتائج کا اعلان کیا، جس میں توقع کے مطابق مودی فاتح قرار پائے۔ انہوں نے کل 33 میں سے 24 ووٹ حاصل کیے جبکہ ان کے قریبی ترین حریف رامپال شرما کو صرف پانچ ووٹ ملے۔

اس فیصلے کے ساتھ بھارتی کرکٹ بورڈ حرکت میں آ گیا اور اس نے اعلان کے محض چند گھنٹوں بعد راجستھان کرکٹ ایسوسی ایشن کو بھارتی بورڈ کی سرگرمیوں میں حصہ لینے سے غیر معینہ مدت تک کے لیے روک دیا۔ بی سی سی آئی کے سیکرٹری سنجے پٹیل کے مطابق یہ فیصلہ دستور کے مطابق کیا گیا جو صدر کو اختیار دیتا ہے کہ وہ بی سی سی آئی کے قواعد و ضوابط کی خلاف ورزی پر کسی بھی ایسوسی ایشن کو معطل کردے ۔ سیکرٹری کے مطابق فیصلہ بورڈ کے عبوری صدر شیولعل یادیو نے کیا اور اب راجستھان کے معاملات چلانے کے لیے ایک عبوری نظام تشکیل دیا جائے گا۔

للت مودی خطرے کے پیش نظر گزشتہ چار سالوں سے لندن میں مقیم ہیں اور انہیں عدالت کے مبصرین کی زیر نگرانی ہونے والے انتخابات میں حصہ لینے کی خصوصی اجازت دی گئی تھی۔