سرفراز احمد ایک ہی اننگز میں کئی سنگ میل عبورکرگئے

آئرلینڈ کے خلاف آخری گروپ مقابلے میں پاکستان کی کارکردگی خاص طور پر سرفراز احمد کی سنچری کا سحر ابھی تک طاری ہے۔ اس ٹورنامنٹ میں کہ جہاں پاکستان کا کوئی بلے باز اس سنگ میل تک نہ پہنچا ہو وہاں ایک ایسے کھلاڑی کا یہ سنگ میل عبور کرنا ایک بڑا کارنامہ ہے، جس سے بہت کم لوگوں کو توقع تھی۔

سرفراز احمد پاکستان کے ابتدائی چاروں مقابلوں میں شریک نہیں تھے، جہاں پاکستان کو بھارت اور ویسٹ انڈیز کے ہاتھوں بدترین شکستیں ہوئیں اور پھر زمبابوے اور متحدہ عرب امارات کے خلاف کامیابیاں حاصل کیں۔ ان مایوس کن ناکامیوں اور غیر موثر فتوحات میں سرفراز دستے کا حصہ نہیں تھے اور جب ناصر جمشید پے در پے ناکام ہوئے تو جنوبی افریقہ جیسے سخت حریف کے خلاف سرفراز احمد کو پہلی بار میدان میں اتارا گیا۔ جہاں 'سیفی' نے 49 گیندوں پر اتنے ہی رنز کی دلیرانہ اننگز کھیلی اور پھر ریکارڈ 6 کیچز پکڑ کر مردِ میدان کا اعزاز حاصل کیا۔ پھر آئرلینڈ کے خلاف پاکستان کے آخری گروپ مقابلے میں انہوں نے اپنے حوالے سے تمام شکوک و شبہات کا خاتمہ کردیا، 124 گیندوں پر 101 رنز کی شاندار اننگز نے نہ صرف انہیں ایک مرتبہ پھر بہترین کھلاڑی کا اعزاز دیا بلکہ کئی ریکارڈ بھی ان کے قدموں میں رکھ دیے۔

سرفراز احمد 8 سال بعد کسی بھی عالمی کپ میں سنچری بنانے والے پہلے پاکستانی بلے بازہیں بلکہ وہ ٹورنامنٹ کی تاریخ سنچری بنانے والے اولین پاکستانی وکٹ کیپر بھی ہیں۔ سرفراز سے پہلے عالمی کپ میں کسی بھی پاکستانی بلے باز کی آخری سنچری 2007ء میں بنائی گئی تھی جب عمران نذیر نے زمبابوے کے خلاف 160 رنز اسکور کیے تھے۔ عالمی کپ میں مجموعی طور پر پاکستان کے 14 بلے بازوں نے سنچریاں بنائی ہیں جن میں سے سعید انور اور رمیز راجہ کو تین، تین بار یہ اعزاز حاصل ہوا ہے۔

عالمی کپ میں سنچریاں بنانے والے پاکستانی بلے باز

بلے باز	ملک	رنز	گیندیں	چوکے	چھکے	بمقابلہ	بمقام	بتاریخ
سرفراز احمد	پاکستان	101*	124	6	0	آئرلینڈ	ایڈیلیڈ	15 مارچ 2015ء
عمران نذیر	پاکستان	160	121	14	8	زمبابوے	کنگسٹن	21 مارچ 2007ء
سعید انور	پاکستان	101	126	7	0	بھارت	سنچورین	یکم مارج 2003ء
سعید انور	پاکستان	113*	148	9	0	نیوزی لینڈ	مانچسٹر	16 جون 1999ء
سعید انور	پاکستان	103	144	11	0	زمبابوے	اوول، لندن	11 جون 1999ء
عامر سہیل	پاکستان	111	139	8	0	جنوبی افریقہ	کراچی	29 فروری 1996ء
رمیز راجہ	پاکستان	119*	155	16	0	نیوزی لینڈ	کرائسٹ چرچ	18 مارچ 1992ء
عامر سہیل	پاکستان	114	136	12	0	زمبابوے	ہوبارٹ	27 فروری 1992ء
رمیز راجہ	پاکستان	102*	158	4	0	ویسٹ انڈیز	ملبورن	23 فروری 1992ء
سلیم ملک	پاکستان	100	95	10	0	سری لنکا	فیصل آباد	25 اکتوبر 1987ء
رمیز راجہ	پاکستان	113	148	5	0	انگلستان	کراچی	20 اکتوبر 1987ء
جاوید میانداد	پاکستان	103	100	6	0	سری لنکا	حیدرآباد	8 اکتوبر 1987ء
ظہیر عباس	پاکستان	103*	121	6	0	نیوزی لینڈ	ناٹنگھم	20 جون 1983ء
عمران خان	پاکستان	102*	133	11	0	سری لنکا	لیڈز	16 جون 1983ء

عالمی کپ میں سرفراز احمد سے پہلے کسی بھی پاکستانی وکٹ کیپر کی سب سے بڑی اننگز 63 رنز کی تھی جو معین خان نے 1999ء میں جنوبی افریقہ کے خلاف کھیلی تھی۔ یوں سرفراز پہلے پاکستانی وکٹ کیپر بنے ہیں جنہوں نے سنچری بنائی ہیں۔ یہ سرفراز کے اپنے ایک روزہ کیریئر کی بھی پہلی سنچری اور سب سے بہترین اننگز ہے۔

عالمی کپ میں پاکستانی وکٹ کیپرز کی طویل ترین اننگز

بلے باز	ملک	رنز	گیندیں	چوکے	چھکے	بمقابلہ	بمقام	بتاریخ
سرفراز احمد	پاکستان	101*	124	6	0	آئرلینڈ	ایڈیلیڈ	15 مارچ 2015ء
معین خان	پاکستان	63	56	6	2	جنوبی افریقہ	ناٹنگھم	5 جون 1999ء
عمر اکمل	پاکستان	59	71	5	1	ویسٹ انڈیز	کرائسٹ چرچ	21 فروری 2015ء
سلیم یوسف	پاکستان	56	49	7	0	ویسٹ انڈیز	لاہور	16 اکتوبر 1987ء
کامران اکمل	پاکستان	55	67	5	0	کینیا	ہمبنٹوٹا	23 فروری 2011ء

عالمی کپ 2015ء میں سرفراز احمد کی سنچری کسی بھی وکٹ کیپر کی بنائی گئی ساتویں سنچری ہے۔ ان سے پہلے سری لنکا کے کمار سنگاکارا مسلسل چار سنچریاں جڑ چکے ہیں جبکہ زمبابوے کے برینڈن ٹیلر نے بھی اپنے کیریئر کے اختتام سے پہلے مسلسل دو سنچریاں بنائیں۔

عالمی کپ تاریخ میں وکٹ کیپرز کی سنچریاں

بلے باز	ملک	رنز	گیندیں	چوکے	چھکے	بمقابلہ	بمقام	بتاریخ
ڈیو ہاؤٹن	زمبابوے	142	137	13	6	نیوزی لینڈ	حیدرآباد	10 اکتوبر 1987ء
اینڈی فلاور	زمبابوے	115*	152	8	1	سری لنکا	نیو پلیمتھ	23 فروری 1992ء
راہول ڈریوڈ	بھارت	145	129	17	1	سری لنکا	ٹاؤنٹن	26 مئی 1999ء
ایڈم گلکرسٹ	آسٹریلیا	149	104	13	8	سری لنکا	برج ٹاؤن	28 اپریل 2007ء
ابراہم ڈی ولیئرز	جنوبی افریقہ	107*	105	8	2	ویسٹ انڈیز	دہلی	24 فروری 2011ء
ابراہم ڈی ولیئرز	جنوبی افریقہ	134	98	13	4	نیدرلینڈز	موہالی	3 مارچ 2011ء
برینڈن میک کولم	نیوزی لینڈ	101	109	12	2	کینیڈا	ممبئی	13 مارچ 2011ء
کمار سنگاکارا	سری لنکا	111	128	12	2	نیوزی لینڈ	ممبئی	18 مارچ 2011ء
کمار سنگاکارا	سری لنکا	105*	76	13	1	بنگلہ دیش	ملبورن	26 فروری 2015ء
کمار سنگاکارا	سری لنکا	117*	86	11	2	انگلستان	ویلنگٹن	یکم مارچ 2015ء
برینڈن ٹیلر	زمبابوے	121	91	11	4	آئرلینڈ	ہوبارٹ	7 مارچ 2015ء
کمار سنگاکارا	سری لنکا	104	107	11	0	آسٹریلیا	سڈنی	8 مارچ 2015ء
کمار سنگاکارا	سری لنکا	124	95	13	4	اسکاٹ لینڈ	ہوبارٹ	11 مارچ 2015ء
برینڈن ٹیلر	زمبابوے	138	110	15	5	بھارت	آکلینڈ	14 مارچ 2015ء
سرفراز احمد	پاکستان	101*	124	6	0	آئرلینڈ	ایڈیلیڈ	15 مارچ 2015ء