نئی منزلوں کا راہی، یونس خان

آج سے 15 سال قبل راولپنڈی سے جس سفر کاآغاز ہوا تھا، وہ کئی سنگ ہائے میل عبور کرتا ہوا اب ایک اورموڑ پر پہنچ چکا ہے۔ یونس خان اپنا 100 واں ٹیسٹ میچ کھیلنے کے لیے کولمبو کےپی سروانامتو اسٹیڈیم میں اتریں گے اور یوں اس اعزاز کو حاصل کرنے والے پانچویں پاکستانی کھلاڑی بن جائیں گے۔ ڈیڑھ دہائی قبل اپنے پہلے ہی ٹیسٹ میں سنچری سے آغاز لینے والے 23 سالہ یونس خان کو شاید خود بھی یقین نہ ہوگا کہ وہ ایک روز "سنچری ٹیسٹ" کھیلیں گے، لیکن کئی قومی ریکارڈ توڑنے کے بعد اب وہ ایک اہم ترین منزل کو پا رہے ہیں اور کئی نئے ریکارڈز بھی اپنی گرفت میں لے رہے ہیں۔

یونس خان سے پہلے صرف چار پاکستانی کھلاڑی ایسے ہیں، جنہیں 100 یا اس سے زیادہ ٹیسٹ مقابلے کھیلنے کو ملے۔ ملک کی جانب سے سب سے زیادہ ٹیسٹ جاوید میانداد نے کھیلے، جنہوں نے 1976ء سے 1993ء تک کل 124 ٹیسٹ مقابلوں میں پاکستان کی نمائندگی کی اور آج بھی سب سے زیادہ ٹیسٹ کے ساتھ سب سے زیادہ رنز کا قومی ریکارڈ بھی رکھتے ہیں۔ ان کے بعد انضمام الحق کا نام ہے، جنہوں نے 120 مقابلے کھیلے۔ وسیم اکرم نے 104 اور سلیم ملک نے 103 ٹیسٹ میں شرکت کی۔ ان چاروں کے علاوہ کسی پاکستانی کے ٹیسٹ مقابلوں کی تعداد تہرے ہندسے میں نہیں پہنچی۔ اب یونس خان اس مقام کو پہنچ رہے ہیں۔

پاکستان کے لیے سب سے زیادہ ٹیسٹ کھیلنے والے کھلاڑی

کھلاڑی	ملک	سال آغاز	سال اختتام	مقابلوں کی تعداد
جاوید میانداد	پاکستان	1976ء	1993ء	124
انضمام الحق	پاکستان	1992ء	2007ء	119
وسیم اکرم	پاکستان	1985ء	2002ء	104
سلیم ملک	پاکستان	1982ء	1999ء	103
یونس خان	پاکستان	2000ء	تا حال	99

یہ نیا اعزاز یونس خان کے سینے پر سجے 'تمغوں' کی طویل قطار میں تازہ اضافہ ہوگا۔ یونس خان پاکستان کے لیے سب سے زیادہ سنچریوں کا اہم ریکارڈ بھی رکھتے ہیں۔ سنچریاں بنانے میں شاید ہی کوئی اتنا بڑا 'استاد' سرزمین پاک پر پیدا ہوا ہو۔ انہوں نے عظیم جاوید میانداد سمیت ہر اس بلے باز کو پیچھے چھوڑا، جو ان سے قبل سنچریوں کے انبار لگا چکا تھا۔ لیکن تعداد کے علاوہ یونس کو جو چیز سب سے ممتاز کرتی ہے، وہ ان کی طویل اننگز کھیلنے کی تڑپ ہے۔ یونس خان کے ٹیسٹ کیریئر میں 29 سنچریاں شامل ہیں اور نصف سنچریوں کی تعداد بھی 29 ہی ہے۔ یعنی ہر دوسری نصف سنچری نے تہرے ہندسے تک پہنچ کر ہی دم لیا۔

پاکستان کے لیے سب سے زیادہ سنچریاں بنانے والے بلے باز

بلے باز	ملک	مقابلے	رنز	بہترین اننگز	اوسط	سنچریاں	نصف سنچریاں
یونس خان	پاکستان	99	8594	313	53.71	29	29
انضمام الحق	پاکستان	119	8829	329	50.16	25	46
محمد یوسف	پاکستان	90	7530	223	52.29	24	33
جاوید میانداد	پاکستان	124	8832	280*	52.57	23	43
سلیم ملک	پاکستان	103	5768	237	43.69	15	29

یونس خان پاکستان کی تاریخ کے واحد بلے باز ہیں جنہوں نے ہر ملک کے خلاف کم از کم ایک سنچری ضرور بنا رکھی ہے۔ کولمبو میں آج وہ جس سری لنکا کے مقابل آئیں گے، وہی ان کا سب سے پسندیدہ حریف ہے۔ 7 مرتبہ سری لنکا کے خلاف سنچری بنانے والے یونس خان نے ایک بار اسی حریف کے مقابلے میں ٹرپل سنچری کا ہندسہ بھی عبور کیا ہے۔ 313 رنز کی اس یادگار اننگز کے علاوہ یونس نےپانچ بار ڈبل سنچری بھی بنائی ہے، یعنی وہ جاوید میانداد کے بعد سب سے زیادہ ڈبل سنچریاں بنانے والے پاکستانی بلے باز ہیں۔ اگر دو مرتبہ 190 رنز بنانے کے بعد ڈبل سنچری سے پہلے آؤٹ نہ ہوتے تو آج یہ تعداد 7 ہوتی۔

تمام ممالک کے خلاف سنچریاں بنانے والے بلے باز

بلے باز	ملک	آخری سنچری اننگز	بمقابلہ	بمقام	بتاریخ
گیری کرسٹن	جنوبی افریقہ	150	بنگلہ دیش	ایسٹ لندن	اکتوبر 2002ء
اسٹیو واہ	آسٹریلیا	100*	بنگلہ دیش	ڈارون	جولائی 2003ء
سچن تنڈولکر	بھارت	248*	بنگلہ دیش	ڈھاکہ	دسمبر 2004ء
راہول ڈریوڈ	بھارت	160	بنگلہ دیش	چٹاگانگ	دسمبر 2004ء
مارون اتاپتو	سری لنکا	127	نیوزی لینڈ	نیپئر	اپریل 2005ء
برائن لارا	ویسٹ انڈیز	130	پاکستان	برج ٹاؤن	مئی 2005ء
ایڈم گلکرسٹ	آسٹریلیا	144	بنگلہ دیش	فتح اللہ	اپریل 2006ء
رکی پونٹنگ	آسٹریلیا	118*	بنگلہ دیش	فتح اللہ	اپریل 2006ء
کمار سنگاکارا	سری لنکا	152	انگلستان	کانڈی	دسمبر 2007ء
مہیلا جے وردھنے	سری لنکا	240	پاکستان	کراچی	فروری 2009ء
ژاک کیلس	جنوبی افریقہ	224	سری لنکا	کیپ ٹاؤن	جنوری 2012ء
یونس خان	پاکستان	106	آسٹریلیا	دبئی	اکتوبر 2014ء

یونس خان نے 99 ٹیسٹ مقابلوں میں 53.71 کے اوسط کے ساتھ 8594 رنز بنا رکھے ہیں اور وہ پاکستان کی جانب سے سب سے زیادہ رنز بنانے والے بلے باز کا ریکارڈ توڑنے سے صرف 238 رنز کے فاصلے پر ہیں۔ عین ممکن ہے کہ سری لنکا کے خلاف اسی سیریز کی بقیہ چار اننگز میں یہ کارنامہ بھی انجام دے ہی دیں۔

پاکستان کے لیے سب سے زیادہ رنز بنانے والے بلے باز

بلے باز	ملک	مقابلے	رنز	بہترین اننگز	اوسط	سنچریاں	نصف سنچریاں
جاوید میانداد	پاکستان	124	8832	280*	52.57	23	43
انضمام الحق	پاکستان	119	8829	329	50.16	25	46
یونس خان	پاکستان	99	8594	313	53.71	29	29
محمد یوسف	پاکستان	90	7530	223	52.29	24	33
سلیم ملک	پاکستان	103	5768	237	43.69	15	29