ورلڈ الیون بمقابلہ ویسٹ انڈیز؛ شاہد آفریدی شرکت کے لیے پر عزم

0 315

پاکستان ٹیم کے سابق کپتان اور عظیم آل راؤنڈر شاہد آفریدی نے 31 مئی کو لارڈز میں ویسٹ انڈیز کے خلاف چیریٹی میچ میں یقینی شرکت کے عزم کا اعادہ کردیا اور اس طرح ان کی شرکت کے حوالے سے پھیلی قیاس آرائیوں کا خاتمہ ہوگیا جن میں گھٹنے کی انجری کے باعث ان کی شرکت کو مشکوک قرار دیا جا رہا تھا۔ یاد رہے لالہ رواں سال پاکستان سپر لیگ کے دوران انجری سے دوچار ہوئے تھے اور 2 ماہ گزرنے کے باوجود اب تک گھٹنے کی انجری سے مکمل صحتیابی حاصل نہیں ہو سکی۔

بوم بوم آفریدی نے اپنی تازہ ٹویٹ میں کہا کہ میں آئی سی سی ورلڈ الیون اور ویسٹ انڈیز کے درمیان میچ کھیلوں کیونکہ میں محسوس کرتا ہوں کہ ایک کرکٹر اور مسلمان ہونے کی حیثیت سے مجھے اس مقصد کے لیے مدد کرنی چاہیے۔ میں ڈاکٹرز کی جانب سے دیے گئے بحالی کے پروگرام پر عمل کر رہا ہوں۔

پاکستان سے اس چیرٹی میچ میں ورلڈلیون کی طرف سے دو کھلاڑی حصہ لے رہے ہیں، شاہدآفریدی کے علاوہ دوسرے سابق کپتان شعیب ملک ہیں جبکہ اس دستے کی قیادت انگلش کپتان ایون مورگن کے ذمے ہے۔

واضح رہے ورلڈالیون اور ویسٹ انڈیز کے مابین اس چیرٹی میچ کا مقصد ان کیریبیئن اسٹیڈیمز کی بحالی کے لئے فنڈ اکٹھا کرنا ہے جو گزشتہ سال ارما اور ماریہ نامی طوفان سے شدید متاثر ہو گئے تھے۔