متھالی راج ریٹائرڈ، ویمنز کرکٹ میں اک عہد کا اختتام

ویمنز انٹرنیشنل کرکٹ میں سب سے زیادہ رنز، ون ڈے انٹرنیشنل میں سب سے زیادہ رنز، 19 سال پر محیط طویل ترین کیریئر، بحیثیتِ کپتان سب سے زیادہ میچز، سب سے کم عمر میں ٹیسٹ ڈبل سنچری اور انٹرنیشنل کیریئر میں سب سے زیادہ نصف سنچریاں، یہ سب ریکارڈ صرف ایک کھلاڑی کے پاس ہیں، بھارت کی کپتان متھالی راج، جنہوں نے آج انٹرنیشنل کرکٹ کو خیرباد کہہ دیا ہے۔

Thank you for all your love & support over the years!
I look forward to my 2nd innings with your blessing and support. pic.twitter.com/OkPUICcU4u

— Mithali Raj (@M_Raj03) June 8, 2022

صرف 22 سال کی عمر میں بھارت کی قیادت سنبھالنے والی متھالی نے اپنے کیریئر میں ‏12 ٹیسٹ، 232 ون ڈے اور 89 ٹی ٹوئنٹی انٹرنیشنل میچز کھیلے۔

ریٹائرمنٹ کا اعلان کرتے ہوئے متھالی راج نے کہا کہ

ایک سفر تمام ہوا، اب ایک اور سفر کا آغاز ہے۔ میں چاہوں گی کہ کسی نہ کسی طرح اپنے پسندیدہ کھیل سے جڑی رہوں اور بھارت میں اور دنیا بھر میں ویمنز کرکٹ کے فروغ کے لیے اپنا کردار ادا کروں

متھالی کے کیریئر کی سب سے نمایاں جھلک ہے ان کا ون ڈے انٹرنیشنل کیریئر، جس میں انہوں نے 7 سنچریوں اور 50.68 کے اوسط کے ساتھ ریکارڈ 7,805 رنز بنائے۔ رواں سال کھیلا گیا ویمنز ورلڈ کپ 2022ء وہ آخری ٹورنامنٹ تھا کہ جس میں متھالی نے بھارت کی نمائندگی کی۔

متھالی راج کے انٹرنیشنل کیریئر پر ایک نظر

فارمیٹ	میچز	رنز	بہترین اننگز	اوسط	100	50
ٹیسٹ	12	699	214	43.68	1	4
ون ڈے	232	7805	125*	50.68	7	64
ٹی ٹوئنٹی	89	2364	97*	37.52	0	17

اس کے علاوہ انہوں نے ٹیسٹ کرکٹ میں 43.68 کے اوسط سے 699 رنز بھی بنائے جبکہ 89 ٹی ٹوئنٹی انٹرنیشنلز میں بھی 17 نصف سنچریوں کی مدد سے 2364 رنز بنائے۔ یوں انہوں نے انٹرنیشنل کرکٹ میں 10 ہزار سے زیادہ رنز بنائے۔ وہ یہ اعزاز حاصل کرنے والی دنیا کی واحد بلے باز ہیں۔

متھالی نے جون 1999ء میں انٹرنیشنل کرکٹ میں قدم رکھا تھا اور صرف 16 سال کی عمر میں پہلے ہی میچ میں ناقابلِ شکست 114 رنز بنائے اور پھر پیچھے مڑ کر نہیں دیکھا۔ اُن کے دور میں بھارت 2005ء اور 2017ء میں ورلڈ کپ فائنل تک پہنچا، البتہ دونوں بار کامیابی حاصل نہیں کر پایا۔

بھارت نے انہیں 2003ء میں ارجن ایوارڈ اور 2015ء میں پدم شری سے بھی نوازا۔