پاکستان ہانگ کانگ مقابلہ ریکارڈز کی نظر سے

ایشیا کپ 2022ء میں پاکستان نے اپنے اہم مقابلے میں ہانگ کانگ کو جس طرح شکست دی ہے، اس نے ریکارڈ بک کو ہلا کر رکھ دیا ہے۔

شارجہ میں ہانگ کانگ پاکستان کی تباہ کن باؤلنگ کی تاب نہ لا سکا اور صرف 38 رنز پر ڈھیر ہو گیا، حالانکہ اسے جیتنے کے لیے 194 رنز کا ہدف ملا تھا۔ یقین نہیں آ رہا تھا یہی وہ ٹیم ہے جو چند روز پہلے بھارت کے خلاف پانچ وکٹوں پر 155 رنز بنا گئی تھی۔

بہرحال، یوں پاکستان نے کسی ٹی ٹوئنٹی انٹرنیشنل میں اپنے حریف کو سب سے کم رنز پر آل آؤٹ کرنے کا ریکارڈ قائم کیا۔ یہی نہیں بلکہ 155 رنز کی فتح کے ساتھ رنز کے لحاظ سے اپنی تاریخ کی سب سے بڑی کامیابی بھی حاصل کی۔

اس سے پہلے پاکستان کے خلاف کسی بھی ٹیم کا سب سے کم اسکور 60 رنز تھا، جو اپریل 2018ء میں ویسٹ انڈیز نے کراچی میں کھیلے گئے ٹی ٹوئنٹی انٹرنیشنل میچ میں بنایا تھا۔

اس کے علاوہ پاکستان دسمبر 2010ء میں نیوزی لینڈ کو 80 اور جون 2018ء میں اسکاٹ لینڈ کو 82 رنز پر آل آؤٹ کر چکا ہے یعنی ہانگ کانگ وہ پہلی ٹیم بن گیا ہے جو پاکستان کے خلاف 50 رنز بھی نہیں بنا پائی۔

ٹی ٹوئنٹی انٹرنیشنل: پاکستان کے خلاف کم ترین ٹوٹل

	بمقابلہ	رنز	اوورز	بمقام	بتاریخ
ہانگ کانگ	پاکستان	38	10.4	شارجہ	‏2 ستمبر 2022ء
ویسٹ انڈیز	پاکستان	60	13.4	کراچی	یکم اپریل 2018ء
نیوزی لینڈ	پاکستان	80	15.5	کرائسٹ چرچ	‏30 دسمبر 2010ء
اسکاٹ لینڈ	پاکستان	82	14.4	ایڈنبرا	‏13 جون 2018ء
بنگلہ دیش	پاکستان	85-9	20.0	میرپور	‏29 نومبر 2011ء

البتہ ٹی ٹوئنٹی انٹرنیشنل میں کسی بھی ٹیم کا سب سے کم رنز پر آل ہونے کا ریکارڈ صرف 21 رنز کا ہے۔ یہ بد قسمت ٹیم ترکی کی تھی، جو اگست 2019ء میں چیک جمہوریہ کے خلاف ایک میچ میں صرف 21 رنز ہی بنا پائی تھی۔

سب سے کم ٹوٹل پر آؤٹ ہونے کے ابتدائی 8 مواقع ایسے ہیں، جن میں انٹرنیشنل کرکٹ کونسل کا کوئی فل ممبر شریک نہیں تھا یعنی کرکٹ دنیا کا کوئی قابلِ ذکر ملک نہیں۔ یہی وجہ ہے کہ کسی بھی فل ممبر کے مقابلے میں سب سے کم ٹوٹل 38 رنز اسی پاکستان-ہانگ کانگ میچ میں بنا ہے۔

‏2014ء میں سری لنکا نیدرلینڈز کو 39 رنز پر آؤٹ کر چکا تھا۔ یہی نیدرلینڈز اکتوبر 2021ء میں اسی سری لنکا کے خلاف 44 رنز پر بھی آل آؤٹ ہو چکا ہے۔

ٹی ٹوئنٹی انٹرنیشنل: سب سے کم ٹوٹل

	رنز	اوورز	بمقابلہ	بمقام	بتاریخ
ترکی	21	8.3	چیک جمہوریہ	الفوو کاؤنٹی	‏30 اگست 2019ء
لیسوتھو	26	12.4	یوگینڈا	کیگالی	‏19 اکتوبر 2021ء
ترکی	28	11.3	لکسمبورگ	الفوو کاؤنٹی	‏29 اگست 2019ء
تھائی لینڈ	30	13.1	ملائیشیا	بانگی	‏4 جولائی 2022ء
ترکی	32	8.5	آسٹریا	الفوو کاؤنٹی	‏31 اگست 2019ء
فن لینڈ	33	13.0	ڈنمارک	برونڈبی	‏7 مئی 2022ء
فلپائن	36	15.2	عمان	العامرات	‏21 فروری 2022ء
پاناما	37	17.2	کینیڈا	کولیج	‏14 نومبر 2022ء
ہانگ کانگ	38	10.4	پاکستان	شارجہ	‏2 ستمبر 2022ء
کیمرون	38	10.1	موزمبیق	کیگالی	‏3 نومبر 2021ء

پاکستان نے ہانگ کانگ کے خلاف اس میچ میں 155 رنز کے بھاری مارجن سے کامیابی حاصل کی ہے، جو رنز کے لحاظ سے پاکستان کی سب سے بڑی ٹی ٹوئنٹی کامیاب ہے لیکن نیا عالمی ریکارڈ نہیں۔ یہ ریکارڈ حیران کن طور پر 257 رنز کا ہے، جو چیک جمہوریہ نے ترکی کے خلاف اسی میچ میں بنایا تھا جس میں ترکی صرف 21 رنز پر ڈھیر ہو گیا تھا۔

کسی بھی قابل ذکر ملک کے مقابلے میں یہ مارجن 172 رنز کا ہے، جب سری لنکا نے ٹی ٹوئنٹی ورلڈ کپ 2007ء میں کینیا کو 172 رنز کی شکست دی تھی۔ 261 رنز کے تعاقب میں کینیا صرف 88 رنز پر آل آؤٹ ہو گیا تھا۔

اس سے پہلے پاکستان کی رنز کے لحاظ سے سب سے بڑی کامیابی ویسٹ انڈیز کے خلاف تھی، جب اس نے اپریل 2018ء میں ویسٹ انڈیز کو 143 رنز سے شکست دی تھی۔

ٹی ٹوئنٹی انٹرنیشنل: رنز کے لحاظ سے سب سے بڑی فتوحات

فاتح	مارجن	ہدف	بمقابلہ	بمقام	بتاریخ
چیک جمہوریہ	257	279	ترکی	الفوو کاؤنٹی	‏30 اگست 2019ء
کینیڈا	208	246	پاناما	کولیج	‏14 نومبر 2021ء
تنزانیہ	178	241	کیمرون	کیگالی	‏6 نومبر 2021ء
رومانیہ	173	227	ترکی	الفوو کاؤنٹی	‏29 اگست 2019ء
سری لنکا	172	261	کینیا	جوہانسبرگ	‏14 ستمبر 2007ء
موزمبیق	171	210	کیمرون	کیگالی	‏3 نومبر 2021ء
اٹلی	166	211	کروشیا	کیراوا	‏16 جولائی 2022ء
آسٹریا	158	207	بلغاریہ	وانٹا	‏30 جولائی 2022ء
ملائیشیا	155	214	بھوٹان	بانگی	‏2 جولائی 2022ء
پاکستان	155	194	ہانگ کانگ	شارجہ	‏2 ستمبر 2022ء