آخری دو مقابلوں کے لیے سری لنکا نے چندیمال اور ہیراتھ کو باہر کر دیا

2 1,027

سری لنکا نے آسٹریلیا کے خلاف ایک روزہ سیریز کے آخری دو مقابلوں کے لیے ٹیم کا اعلان کر دیا ہے اور نوجوان بلے باز دنیش چندیمال اور اسپنر رنگانا ہیراتھ کو باہر نکال دیا ہے۔ سیریز میں آسٹریلیا کو 2-1 کی برتری حاصل ہے اور میزبان سری لنکا کو سیریز میں فتح کے لیے اگلے دونوں میچز جیتنے لازمی ہیں۔

دنیش چندیمال جیسے باصلاحیت نوجوان کھلاڑی کا اخراج اور چماراسلوا جیسے آزمودہ بلے باز کی شمولیت سمجھ سے باہر ہے
دنیش چندیمال جیسے باصلاحیت نوجوان کھلاڑی کا اخراج اور چماراسلوا جیسے آزمودہ بلے باز کی شمولیت سمجھ سے باہر ہے

ان دونوں کھلاڑیوں کی جگہ نوجوان اسپنر سیکوگے پرسنا اور نائب کپتان اینجلو میتھیوز کو طلب کیا گیا ہے۔ سیکوگے اس وقت انگلستان میں سری لنکا اے کی نمائندگی کر رہے ہیں اور فوری طور پر وطن واپس پہنچ رہے ہیں جبکہ میتھیوز زخمی ہونے کے باعث تیسرا ایک روزہ میچ نہیں کھیل پائے تھے۔

سری لنکا کے کپتان تلکارتنے دلشان نے کہا ہے کہ میتھیوز سیریز کے بقیہ میچز کے لیے مکمل تیار ہیں، انہیں تیسرا ایک روزہ بھی کھلایا جا سکتا تھا لیکن ہم نے خطرہ مول نہیں لیا۔ ان کے پاس اب مکمل صحت یابی کے لیے مزید تین دن ہیں۔ اینجلو ہمارے دستے کے اہم رکن ہیں، اور ان کی عدم موجودگی ٹیم کےلیے بڑا نقصان شمار ہوتی ہے۔

21 سالہ چندیمال، جنہوں نے حالیہ دورۂ انگلستان میں لارڈز میں شاندار ناقابل شکست سنچری بنائی اور ایک روزہ سیریز کے فیصلہ کن میچ میں 54 رنز کی اچھی اننگز کھیلی، اس کے بعد سے متعدد مواقع پر ناکام ہوئے ہیں اور چار مقابلوں میں صرف 41 رنز بنا پائے ہیں۔

دوسری جانب پیریرا نے عالمی کپ کے فائنل کے بعد صرف ایک مقابلہ کھیلا ہے۔ وہ مقامی کرکٹ میں متاثر کن ریکارڈ کے حامل ہیں جہاں گزشتہ وہ 18.38 کی اوسط سے 73 وکٹیں حاصل کر چکے ہیں۔ دوسری جانب تیسرے تیز باؤلر کی جگہ میتھیوز، سورنگا لکمل یا شامنڈا ایرنگا سے پر کی جائے گی۔

دونوں ٹیموں کے درمیان ایک روزہ سیریز کا چوتھا معرکہ 20 اگست کو راناسنگھے پریماداسا اسٹیڈیم، کولمبو میں ہوگا۔

سری لنکا کا اعلان کردہ دستہ ان کھلاڑیوں پر مشتمل ہے:

تلکارتنے دلشان (کپتان)، اجنتھا مینڈس، اوپل تھارنگا،اینجلو میتھیوز، جیون مینڈس، چمارا سلوا، سورج رندیو، سورنگا لکمل، سیکوگے پرسنا، شامنڈا ایرنگا، کمار سنگاکارا، لاستھ مالنگا، مہیلا جے وردھنے اور نووان کولاسیکرا۔