بھارت سمیت سب سے نمٹ لیں گے، بلند عزائم کے ساتھ شاہد آفریدی ڈھاکہ روانہ

2 530

ایک مرتبہ پھر ورلڈ ٹی ٹوئنٹی کا اعزاز حاصل کرنے کی تمنا لیے پاکستان کے آل راؤنڈر شاہد خان آفریدی بنگلہ دیش روانہ ہوگئے ہیں اور ان کا کہنا ہے کہ خود سے وابستہ امیدوں پر پورا اترنے کی کوشش کروں گا اور عوام کی دعاؤں سے اس مرتبہ پاکستان ضرور ورلڈ ٹی ٹوئنٹی چیمپئن بنے گا۔

صرف بھارت ہی نہیں گروپ کے تمام حریفوں سے بھی سخت مقابلہ ہوگا (تصویر: Getty Images)
صرف بھارت ہی نہیں گروپ کے تمام حریفوں سے بھی سخت مقابلہ ہوگا (تصویر: Getty Images)

کراچی سے ڈھاکہ کے لیے روانگی کے وقت صحافیوں سے گفتگو کرتے ہوئے شاہد آفریدی نے کہا کہ صرف بھارت ہی نہیں بلکہ پاکستان کو اپنے گروپ میں دیگر سخت حریفوں کا بھی سامنا ہوگا۔ پاکستان آج یعنی سوموار کو اپنا پہلا وارم اپ مقابلہ نیوزی لینڈ کے خلاف کھیلے گا جبکہ دوسرا وارم اپ جنوبی افریقہ کے خلاف 19 مارچ کو کھیلا جائے گا جس میں شاہد آفریدی شرکت کریں گے۔

ورلڈ ٹی ٹوئنٹی میں پاکستان کی مہم کا باضابطہ آغاز 21 مارچ کو بھارت کے خلاف اہم ترین مقابلے سے ہوگا جس کے بارے میں شاہد آفریدی کا کہنا ہے کہ یہ روایتی حریف کے خلاف ان کا پہلا مقابلہ نہیں ہے ، اٹھارہ انیس سال سے بھارت کے خلاف کھیل رہے ہیں اور وہ ان کی طاقت اور کمزوریاں دونوں کو جانتے ہیں اور ورلڈ چیمپئن بننے کے لیے ہم بھارت کے علاوہ ہر ٹیم سے نمٹ لیں گے۔

شاہد آفریدی اس وقت پہلو میں کھنچاؤ کی وجہ سے تکلیف کا شکار ہیں اور یہی وجہ ہے کہ وہ ٹیم کی روانگی کے چند روز بعد بنگلہ دیش گئے ہیں۔ حالیہ ایشیا کپ میں پاکستان کو روایتی حریف بھارت اور بنگلہ دیش کے خلاف مقابلوں میں ناقابل یقین فتوحات دلانے کے بعد پاکستان کو شاہد آفریدی سے بہت امیدیں وابستہ ہیں کہ وہ ورلڈ ٹی ٹوئنٹی 2009ء کی کارکردگی دہرا کر پاکستان کو ایک مرتبہ پھر عالمی چیمپئن بنائیں گے۔