آئی سی سی ایوارڈز: مچل جانسن چھا گئے، دونوں اعلیٰ ترین اعزازات جیت لیے

0 1,017

آسٹریلیا کے تیز گیندباز مچل جانسن نے دنیائے کرکٹ کے دونوں اعلیٰ اعزازات جیت لیے ہیں اور یوں ہم وطن رکی پونٹنگ کے بعد تاریخ کے پہلے کھلاڑی بن چکے ہیں جنہیں دو مرتبہ سال کے بہترین کھلاڑی کی سر گارفیلڈ سوبرز ٹرافی ملی ہے۔

مچل جانسن نے سال کے بہترین کھلاڑی کا اعزاز دو بار حاصل کرنے والے تاریخ کے محض دوسرے کھلاڑی بن گئے ہیں (تصویر: Getty Images)
مچل جانسن نے سال کے بہترین کھلاڑی کا اعزاز دو بار حاصل کرنے والے تاریخ کے محض دوسرے کھلاڑی بن گئے ہیں (تصویر: Getty Images)

2004ء میں شروع ہونے والے آئی سی سی ایوارڈز میں رواں سال بہترین کھلاڑی کے لیے مچل جانسن کا مقابلہ جنوبی افریقہ کے ابراہم ڈی ولیئرز، سری لنکا کے اینجلو میتھیوز اور کمار سنگاکارا سے تھا لیکن ایوارڈز انتظامیہ نے طویل غوروخوض کے بعد نہ صرف گارفیلڈ سوبرز ٹرافی بلکہ سال کے بہترین ٹیسٹ کھلاڑی کا اعزاز بھی 'مچ' ہی کو سونپنے کا اعلان کیا ہے۔ رواں سال آسٹریلیا کے قومی ایوارڈز میں ایلن بارڈر میڈل بھی جیتنے والے جانسن نے پہلی بار 2009ء میں جبکہ رکی پونٹنگ نے 2006ء اور 2007ء میں مسلسل دو سال یہ ٹرافی جیتی تھی۔

جنوبی افریقہ کے ایک روزہ کپتان ابراہم ڈی ولیئرز نے سال کے بہترین ون ڈے کھلاڑی کا اعزاز جیتا جس کے لیے انہوں نے ہم وطن ڈیل اسٹین، کوئنٹن ڈی کوک اور بھارت کے ویراٹ کوہلی کو شکست دی ہے۔

سال بھر مایوس کن کارکردگی کے باوجود انگلستان 11 میں سے تین اعزازات جیتنے میں کامیاب رہا ہے۔ نوجوان بلے باز گیری بیلنس سال کے ابھرتے ہوئے کھلاڑی قرار پائے ہیں جبکہ سارا ٹیلر سال کی بہترین خاتون کھلاڑی کا اعزاز حاصل کرنے میں کامیاب رہیں۔ رواں سال آئی سی سی ایوارڈز کی پاکستان کی واحد نامزدگی امپائر علیم ڈار کی صورت میں تھی لیکن رواں سال ڈیوڈ شیفرڈ ٹرافی انگلستان ہی سے تعلق رکھنے والے رچرڈ کیٹلبرو کو ملی ہے۔

علاوہ ازیں سال کی بہترین ٹی20 کارکردگی پر خصوصی اعزاز آسٹریلیا کے آرون فنچ کو ملا ہے جنہوں نے 63 گیندوں پر 156 رنز کی تاریخی اننگز کھیلی تھی۔جبکہ ان کی ہم وطن میگ لیننگ سال کی بہترین خاتون ٹی20 کھلاڑی کا اعزاز حاصل کرنے میں کامیاب ہوئیں۔

بھارت کے نوجوان تیز باؤلر بھوونیشور کمار پہلے ہی عوامی پسند کا پیپلز چوائس ایوارڈ جیت چکے ہیں۔

ان اعزازات کے لیے کھلاڑیوں کا انتخاب 26 اگست 2013ء سے 17 ستمبر 2014ء کے درمیان پیش کی جانے والی کارکردگی کی بنیاد پر کیا گیا۔

آئی سی سی ایوارڈز 2014ء میں اعزازات جیتنے والوں کی مکمل فہرست ذیل میں پیش ہے:

آئی سی سی ایوارڈز 2014ء کے فاتحین

اعزاز کھلاڑی ملک
سال کا بہترین کھلاڑی مچل جانسن آسٹریلیا
سال کا بہترین ٹیسٹ کھلاڑی مچل جانسن آسٹریلیا
سال کا بہترین ایک روزہ کھلاڑی ابراہم ڈی ولیئرز جنوبی افریقہ
سال کا ابھرتا ہوا کھلاڑی گیری بیلنس انگلستان
سال کا بہترین ایسوسی ایٹ اور ایفیلیٹ کھلاڑی پریسٹن مومسن اسکاٹ لینڈ
سال کی بہترین ٹی20 کارکردگی آرون فنچ آسٹریلیا
سال کی بہترین ایک روزہ خاتون کھلاڑی سارا ٹیلر انگلستان
سال کی بہترین ٹی20 خاتون کھلاڑی میگ لیننگ انگلستان
سال کا بہترین امپائر رچرڈ کیٹلبرو انگلستان
پیپلز چوائس ایوارڈ بھوونیشور کمار بھارت
اسپرٹ آف کرکٹ ایوارڈ کیتھرین برنٹ انگلستان