[ریکارڈز] یونس خان چوتھی اننگز میں ہزار رنز بنانے والے پہلے پاکستانی

ٹیسٹ مقابلوں میں چوتھی اننگز کو بلے بازوں کے لیے سب سے مشکل معرکہ سمجھا جاتا ہے۔ چند روز تک دونوں ٹیموں کے بلے بازوں کو آؤٹ کرنے کے بعد پچ اس حد تک اکھڑ اور ادھڑ چکی ہوتی ہے کہ اسپنرز اس کا فائدہ اٹھا کر کسی بھی بلے باز کو نچا سکتے ہیں۔ لیکن اس صورتحال میں کہ جب ٹیم ایک ہدف کی جانب گامزن ہو اور صورتحال حریف ٹیم کے لیے سازگار ہو، بہت کم بلے باز ایسے ہوتے ہیں جو ٹک پاتے ہیں۔ یہی وجہ ہے کہ کرکٹ کی تاریخ میں آج تک ایک بھی ایسا بلے باز پیدا نہیں ہوا جس نے میچ کی چوتھی اننگز میں محض پانچ سنچریاں اسکور کی ہوں اور اسی اننگز میں ایک ہزار رنز بنانے والے بلے باز بھی محض 21 ہیں۔ جن میں تازہ ترین اضافہ پاکستان کے یونس خان کا ہے۔

گو کہ گال میں پہلا ٹیسٹ پاکستان ناقص بلے بازی کی وجہ سے ہار گیا، لیکن دوسری اننگز میں یونس خان نے 87 رنز بنا کر اس اہم سنگ میل کو عبور کیا یعنی پاکستان کی جانب سے چوتھی اننگز میں ایک ہزار رنز بنانے والا پہلا بلے باز۔ ساتھ ساتھ ان کا اس اننگز کا اوسط بھی دنیا کے تمام کھلاڑیوں سے زیادہ ہو گیا۔

اگر کم از کم ایک ہزار ٹیسٹ رنز بنانے کو معیار قرار دیا جائے تو چوتھی اننگز میں یونس خان کا اوسط 59.70 دنیا کے تمام بلے بازوں سے زیادہ ہے۔ یونس خان نے انگلستان کے عظیم کپتان جیفری بائیکاٹ کے چوتھی اننگز کے اوسط 58.76 کو عبور کیا۔ اس فہرست میں بائیکاٹ کے علاوہ ماضی کے عظیم بلے بازوں سنیل گاوسکر اور گورڈن گرینج کے نام بھی شامل ہیں۔ مکمل فہرست ملاحظہ کیجیے:

بلے باز		کیریئر دورانیہ	میچز	اننگز	رنز	بہترین اسکور	اوسط	سنچریاں	نصف سنچریاں	صفر
یونس خان		2000ء تا 2012ء	30	25	1015	131*	59.70	4	5	5
جیفری بائیکاٹ		1965ء تا 1981ء	36	34	1234	128*	58.76	3	7	2
سنیل گاوسکر		1971ء تا 1987ء	34	33	1398	221	58.25	4	8	2
گریم اسمتھ		2002ء تا 2012ء	36	35	1504	154*	57.84	4	9	2
گورڈن گرینج		1974ء تا 1991ء	41	38	1383	214*	53.19	3	6	1
رکی پونٹنگ		1995ء تا 2012ء	55	42	1454	156	51.92	4	6	3
مہیلا جے وردھنے		1998ء تا 2011ء	38	29	1006	123	50.30	3	5	1
میتھیو ہیڈن		1994ء تا 2008ء	39	39	1287	101*	49.50	1	9	1
گراہم گوچ		1978ء تا 1995ء	30	29	1121	133	44.84	3	5	1
ڈیسمنڈ ہینز		1978ء تا 1994ء	45	45	1092	112*	43.68	2	4	2

87 رنز کی اسی اننگز کے دوران یونس خان ٹیسٹ کرکٹ کی تاریخ میں چوتھی اننگز میں ایک ہزار رنز بنانے والے دنیا کے 21 ویں اور پاکستان کے پہلے بلے باز بنے۔ پاکستان کے کسی بھی بلے باز کو یہ اعزاز حاصل نہیں ہوا۔ دوسرے نمبر پر انضمام الحق ہیں جنہوں نے 39.40 کی اوسط سے 867 رنز بنائے تھے۔ قارئین کی دلچسپی کے لیے ایک مختصر فہرست یہاں پیش کر رہے ہیں:

بلے باز		کیریئر دورانیہ	میچز	اننگز	رنز	بہترین اسکور	اوسط	سنچریاں	نصف سنچریاں	صفر
یونس خان		2000ء تا 2012ء	30	25	1015	131*	59.70	4	5	5
انضمام الحق		1992ء تا 2007ء	39	30	867	138*	39.40	1	6	2
محمد یوسف		1998ء تا 2010ء	30	25	817	88*	43.00	0	6	1
جاوید میانداد		1976ء تا 1993ء	36	22	816	103*	54.40	2	5	1
معین خان		1990ء تا 2004ء	24	17	514	117*	36.71	1	3	1
توفیق عمر		2002ء تا 2012ء	22	22	511	88	28.38	0	3	2
محمد حفیظ		2003ء تا 2012ء	18	18	503	102*	38.69	1	2	0
عمران فرحت		2003ء تا 2010ء	20	20	482	67	25.36	0	4	0
سعید انور		1994ء تا 2000ء	15	14	454	77	34.92	0	6	2
سلیم ملک		1982ء تا 1999ء	30	21	448	155	28.00	1	0	2

ان دو اہم معرکوں کو سر کرنے کے باوجود یونس ایک سنگ میل حاصل کرنے سے رہ گئے۔ اگر وہ مزید 13 رنز بنا لیتے تو چوتھی اننگز میں پانچ سنچریاں جڑنے والے دنیا کے پہلے بلے باز بن جاتے۔ اس وقت دنیا کے چار بلے باز ہیں جو چوتھی اننگز میں 4 سنچریاں اسکور کر چکے ہیں۔ ان چار میں سے دو سنچریاں انہوں نے جنوبی افریقہ کے 2007ء کے دورۂ پاکستان میں دو مسلسل مقابلوں میں جڑیں جبکہ ایک نومبر 2007ء میں کولکتہ میں بھارت کے خلاف اور آخری 2010ء میں دبئی میں جنوبی افریقہ کے خلاف رسید کی۔ آخر الذکر دونوں سنچریاں ناقابل شکست تھیں یعنی وہ آؤٹ نہیں ہوئے۔

اب دیکھنا یہ ہے کہ سری لنکا کے خلاف ایک روزہ سیریز میں ناکامی کے بعد یونس ٹیسٹ میں اپنی اہلیت کس طرح ثابت کرتے ہیں۔ کم از کم پہلے ٹیسٹ میں تو انہوں نے اپنی اہمیت ثابت کر دی ہے جہاں پہلی اننگز میں وہ امپائر کے ناقص فیصلے کا نشانہ بنے اور دوسری میں پاکستانی اننگز کے ٹاپ اسکورر رہے۔ اب جبکہ پاکستان ایک-صفر کے خسارے میں ہے اور 30 جون کو کولمبو میں دوسرا ٹیسٹ شروع ہونے جا رہا ہے، وہ سیریز میں واپس آنے کے لیے یونس پر انحصار کر رہا ہے۔