خبر رساں اداروں نے بھارت-انگلستان ٹیسٹ کا بائیکاٹ کر دیا
بھارت اور انگلستان کے مابین ٹیسٹ سیریز کے آغاز سے قبل ہی بھارتی کرکٹ بورڈ اور خبر رساں اداروں کے درمیان تنازع نے خطرناک صورتحال اختیار کر لی ہے اور بی سی سی آئی کی جانب سے تصویریں فراہم کرنے والے اداروں پر عائد بندشوں کے خلاف اہم بین الاقوامی خبر رساں اداروں نے احتجاجاً سیریز کے پہلے ٹیسٹ کا بائیکاٹ کر دیا ہے۔
بائیکاٹ کرنے والے بین الاقوامی اداروں میں تھامسن رائٹرز، ایجنسی فرانس-پریس اور ایسوسی ایٹڈ پریس جیسے موقر ادارے بھی شامل ہیں، جو مذکورہ دورے کی خبریں اور ساتھ ساتھ تصاویر بھی پیش نہیں کریں گے۔ برطانیہ کاقومی خبر رساں ادارہ پریس ایسوسی ایشن بھی اس احتجاج میں شریک ہے اور دورے کی تصاویر فراہم نہیں کرے گا۔
بین الاقوامی و مقامی ابلاغی انجمنوں کے اتحاد نیوز میڈیا کوالیشن (NMC) کی جانب سے جاری کردہ اعلامیہ کے مطابق گیٹی امیجز، ایکشن امیجز اور دو بھارتی تصویری ایجنسیوں پر پابندی کے بعد بین الاقوامی خبری اداروں نے احمد آباد ٹیسٹ کی تصویری یا خبری کوریج نہ کرنے کا فیصلہ کیا ہے۔
عموماً تصویری و خبر رساں ادارے ہر دورے میں ہزاروں تصاویر و خبریں جاری کرتے ہیں لیکن بی سی سی آئی کی جانب سے اہم اداروں کو اجازت نہ دینے کے بعد اب صرف بھارتی بورڈ کی جاری کردہ تصاویر ہی منظر عام پر آئیں گی۔
آج سے احمد آباد میں شروع ہونے والے پہلے ٹیسٹ کی تصاویر بھارتی کرکٹ بورڈ کی ویب سائٹ پر دستیاب ہوں گی۔
