نیوزی لینڈ-انگلستان مقابلے میں ریکارڈ کے انبار لگ گئے

عالمی کپ کا ساتواں دن اب تک کے سب سے یکطرفہ مقابلے کا گواہ رہا، لیکن اس کے باوجود مقابلے میں تفریح کا تمام سامان موجود تھا۔ 34 ہزار تماشائیوں نے نیوزی لینڈ کے گیندبازوں کو انگلستان کو صرف 123 رنز کے اسکور پر سمیٹتے اور پھر صرف 12.2 اوورز میں اس ہدف کو حاصل کرتے ہوئے بھی دیکھا۔ ٹم ساؤتھی اور برینڈن میک کولم کی شاندار کارکردگی نے ریکارڈز کے انبار لگا دیے۔

تیز ترین تعاقب:

سب سے پہلے 124 رنز کے ہدف کا صرف 12.2 اوورز میں حصول، جو بین الاقوامی کرکٹ تاریخ میں تیسرا تیز ترین کامیاب تعاقب ہے۔ سب سے کم اوورز میں ہدف کا تعاقب کرنے میں جنوبی افریقہ اور آسٹریلیا کے بعد نیوزی لینڈ تیسرے نمبر پر ہے۔ جنوبی افریقہ نے 2003ء میں بنگلہ دیش کے خلاف 109 رنز کا ہدف صرف 12 اوورز میں حاصل کرکے عالمی ریکارڈ قائم کیا تھا۔ اسی سال آسٹریلیا نے انگلینڈ کے خلاف 118 رنز کے تعاقب میں صرف 12.2 اوورز کا استعمال کیا۔ آج ہونے والے مقابلے میں نیوزی لینڈ صرف 7 اوورز میں 105 رنز بنا چکا تھا لیکن برینڈن میک کولم کے آؤٹ ہونے کے بعد اننگز کچھ تھم سی گئی اور نیوزی لینڈ عالمی ریکارڈ نہ بنا سکا۔

ایک روزہ مقابلوں میں تیز ترین تعاقب

ملک	رنز	استعمال شدہ اوورز	بمقابلہ	بمقام	بتاریخ
جنوبی افریقہ	109/0	12.0	بنگلہ دیش	بلوم فونٹین	23 فروری 2003ء
آسٹریلیا	118/0	12.2	انگلستان	سڈنی	23 جنوری 2003ء
نیوزی لینڈ	125/2	12.2	انگلستان	ویلنگٹن	20 فروری 2015ء
ویسٹ انڈیز	111/2	13.2	آسٹریلیا	سڈنی	18 جنوری 1989ء
آسٹریلیا	106/0	13.5	بنگلہ دیش	نارتھ ساؤنڈ	31 مارچ 2007ء

ٹم ساؤتھی کی تاريخی گیندبازی:

نیوزی لینڈ کے تیز گیندباز ٹم ساؤتھی نے تاریخی باؤلنگ کروائی اور ان کے سامنے انگلستان کی اننگز تاش کی پتوں کی طرح بکھر گئی۔ ساؤتھی کی جان لیوا باؤلنگ کے سامنے انگلستان کے جو روٹ کے علاوہ کوئی بلے باز ٹک نہیں پایا۔ ساؤتھی نے 9 اوورز پھینکے، صرف 33 رنز دیے اور 7 کھلاڑیوں کو آؤٹ کیا اور یوں تاریخ کے چوتھے باؤلر بن گئے ہیں جنہوں نے عالمی کپ کے کسی مقابلے میں اننگز میں 7 یا زیادہ وکٹیں لی ہوں۔

عالمی کپ کے کسی مقابلے میں بہترین گیندبازی کا ریکارڈ آسٹریلیا کے گلین میک گرا کے پاس ہے جنہوں نے عالمی کپ 2003ء میں نمیبیا کے خلاف صرف 15 رنز دے کر 7 وکٹیں حاصل کی تھیں۔ اسی عالمی کپ میں انگلستان کے خلاف آسٹریلیا کے اینڈی بکل نے 20 رنز دے کر 7 بلے بازوں کو ٹھکانے لگایا۔ ساؤتھی کے علاوہ ویسٹ انڈیز کے ونسٹن ڈیوس نے 1983ء کے عالمی کپ میں آسٹریلیا کے خلاف 51 رنز دے کر 7 کھلاڑیوں کو آؤٹ کیا تھا۔

ویسے ٹم ساؤتھی کی 33 رنز دے کر 7 وکٹیں ون ڈے کرکٹ میں کسی بھی نیوزی لینڈ کے باؤلر کی بہترین کارکردگی ہیں، بلکہ ان سے پہلے نیوزی لینڈ کے کسی باؤلر نے کبھی ایک روزہ کرکٹ میں 7 وکٹیں حاصل نہیں کیں۔ شین بانڈ نے اگست 2005ء میں بھارت کے خلاف 19 رنز دے کر 6 وکٹیں حاصل کی تھیں۔

ایک روزہ میں نیوزی لینڈ کے گیندبازوں کی بہترین باؤلنگ

گیندباز	ملک	اوورز	رنز	وکٹیں	بمقابلہ	بمقام	بتاریخ
ٹم ساؤتھی	نیوزی لینڈ	9	33	7	انگلستان	ویلنگٹن	20 فروری 2015ء
شین بونڈ	نیوزی لینڈ	9	19	6	بھارت	بلاوایو	26 اگست 2005ء
شین بونڈ	نیوزی لینڈ	10	23	6	آسٹریلیا	پورٹ ایلزبتھ	11 مارچ 2003ء
اسکاٹ اسٹائرس	نیوزی لینڈ	7	25	6	ویسٹ انڈیز	پورٹ آف اسپین	12 جون 2002ء
ڈینیل ویٹوری	نیوزی لینڈ	6	7	5	بنگلہ دیش	کوئنزٹاؤن	31 دسمبر 2007ء

میک کولم کی قہر انگیز بلے بازی:

ویسٹ پیک اسٹیڈیم میں موجود ہزاروں تماشائی ابھی ٹم ساؤتھی کی جادوئی باؤلنگ کے سحر سے ہی نہیں نکلے تھے کہ برینڈن میک کولم انگلش گیندبازوں پر قہر بن کر ٹوٹ پڑے۔ انہوں نے صرف 25 گیندوں پر 77 رنز بنا کر انگلستان کو ناک آؤٹ پنچ لگایا۔ اس دوران میک کولم نے صرف 18 گیندوں پر نصف سنچری مکمل کی اور یوں ورلڈ کپ میں تیز ترین نصف سنچری کا اپنا ہی بنایا گیا ریکارڈ برابر کرڈالا۔

میک کولم نےعالمی کپ 2007ء میں کینیڈا کے خلاف صرف 20 گیندوں پر نصف سنچری بنائی تھی، اور آج صرف 18 گیندوں کا استعمال کیا۔ اس دوران انہوں نے اسٹیون فن کو لگاتار چار چھکے بھی رسید کیے، جن کے دو اوورز میں مجموعی طور پر 49 رنز لوٹے گئے۔

یہ بے رحمانہ اننگز میک کولم نے 308 کے اسٹرائیک ریٹ کے ساتھ کھیلی جو ایک روزہ کرکٹ میں 50 سے زیادہ رنز کی دوسری سب سے زيادہ اسٹرائیک ریٹ والی اننگز تھی۔ ان کے علاوہ صرف شاہد آفریدی اور ابراہم ڈی ولیئرز ہی ایسے کھلاڑی ہیں جنہوں نے 300 کے زیادہ کے اسٹرائیک ریٹ کے ساتھ 50 سے زیادہ رنز بنا رکھے ہیں۔

ایک روزہ میں تیز ترین نصف سنچریاں

بلے باز	ملک	گیندیں	کل رنز	بمقابلہ	بمقام	بتاریخ
ابراہم ڈی ولیئرز	جنوبی افریقہ	16	149	ویسٹ انڈیز	جوہانسبرگ	18 جنوری 2015ء
سنتھ جے سوریا	سری لنکا	17	76	پاکستان	سنگاپور	7 اپریل 1996ء
سائمن اوڈونیل	آسٹریلیا	18	74	سری لنکا	شارجہ	2 مئی 1990ء
شاہد آفریدی	پاکستان	18	102	سری لنکا	نیروبی	4 اکتوبر 1996ء
شاہد آفریدی	پاکستان	18	55*	نیدرلینڈز	کولمبو	21 ستمبر 2002ء
گلین میکس ویل	آسٹریلیا	18	60	بھارت	بنگلور	2 نومبر 2013ء
شاہد آفریدی	پاکستان	18	59	بنگلہ دیش	میرپور	3 مارچ 2014ء
برینڈن میک کولم	نیوزی لینڈ	18	77	انگلستان	ویلنگٹن	20 فروری 2015ء

تیز ترین پیشقدمی:

124 رنز کے معمولی ہدف کے تعاقب کے لیے بھی نیوزی لینڈ نے اننگز کا رفتار اس طرح کیا، گویا اسے 450 رنز کا ہدف درپیش ہو۔ ابتدائی 6.4 اوورز میں ہی نیوزی لینڈ کا مجموعہ تہرے ہندسے میں پہنچ گیا، جو 2001ء کے بعد سے اب تک کسی بھی ٹیم کے تیز ترین 100 رنز ہیں۔

نیوزی لینڈ ٹیم اب تک عالمی کپ میں ہونے والے اپنے تمام مقابلے جیت چکی ہے اور اب اس کا اگلا مقابلہ 28 فروری کو آسٹریلیا کے ساتھ ہو گا، جس میں وہ یقیناً آسٹریلیا کے لیے ایک مضبوط حریف کے طور پر میدان میں اترے گی۔