زخمی روہیت شرما کی جگہ منوج تیواری طلب

1 680

بھارت نے بنگال سے تعلق رکھنے والے منوج تیواری کو انگلستان کے خلاف ایک روزہ سیریز کے لیے طلب کر لیا ہے۔ وہ پہلے ایک روزہ میں زخمی ہونے والے روہیت شرما کی جگہ ٹیم میں جگہ پائیں گے۔

روہیت شرما ایک روزہ سیریز میں کھیلی گئی پہلی ہی گیند پر زخمی ہو کر سیریز سے باہر ہو گئے
روہیت شرما ایک روزہ سیریز میں کھیلی گئی پہلی ہی گیند پر زخمی ہو کر سیریز سے باہر ہو گئے

چیسٹر لی اسٹریٹ میں کھیلے گئے پہلے ایک روزہ میچ کے دوران روہیت شرما پہلی ہی گیند اپنے دائیں ہاتھ پر لگنے کے باعث زخمی ہو گئے تھے۔ ہسپتال کے مطابق ان کی شہادت کی انگلی کی ہڈی ٹوٹ گئی ہے اور وہ سیریز میں دوبارہ ایکشن میں نظر نہیں آ سکیں گے۔ اس لیے بھارت نے فوری طور پر ان کا متبادل طلب کر لیا ہے۔ یوں روہیت شرما ایک روزہ سیریز میں صرف ایک گیند کے مہمان ثابت ہوئے۔

منوج تیواری تین ایک روزہ بین الاقوامی مقابلوں میں بھارت کی نمائندگی کر چکے ہیں جن میں سے دو انہوں نے رواں سال جون میں دورۂ ویسٹ انڈیز میں کھیلے لیکن اپنی کارکردگی سے بہت زیادہ متاثر نہ کر سکے۔

دوسری جانب پیر کے پنجے کی تکلیف کے باعث سچن ٹنڈولکر کی صحت یابی کے حوالے سے بھی ابھی کوئی حتمی خبر سامنے نہیں آئی ہے۔ وہ کل لندن میں معالج سے رابطہ کریں گے۔