مورگن زخمی، آفریدی ورلڈ الیون کے قائد مقرر

0 970

31 مئی کو لارڈز کے تاریخی میدان میں ورلڈالیون اور ویسٹ انڈیز کے مابین ایک ٹی20 چیریٹی میچ کھیلا جا رہا ہے جس میں ورلڈ الیون کی قیادت انگلینڈ کے کپتان ایون مورگن کو سونپی گئی تھی تاہم انجری مسائل کی وجہ سے وہ چیرٹی میچ میں شرکت سے دستبردار ہو گئے ہیں اور اب ورلڈ الیون کی قیادت پاکستان کے شاہد خان آفریدی کو دے دی گئی ہے۔

جبکہ آئی سی سی نے مورگن کی جگہ سیم بلنگز کو ٹیم میں طلب کر لیا اس کے علاوہ ٹائمل ملز کو بھی اسکواڈ میں شامل کیا گیا ہے۔

یہ اہم ذمہ داری ملنے کے بعد عظیم آل راؤنڈر شاہد خان آفریدی نے ٹویٹر اکاؤنٹ کے ذریعے پیغام میں کہا ہے کہ آئی سی سی ورلڈ الیون کی قیادت کرنا میرے لیے ایک اعزاز کی بات ہے، انگلینڈ میں لارڈز کے میدان میں ویسٹ انڈئیز کے خلاف ٹی ٹوئنٹی کرکٹ میچ کا انعقاد ایک نیک مقصد کے لیے ہے اور مجھے امید ہے کہ دونوں ٹیموں کے کھلاڑی بھرپور جوش و جذبے سے میچ میں شرکت کریں گے۔

واضح رہے یہ میچ طوفان سے متاثرہ ویسٹ انڈین اسٹیڈیمز کی بحالی کے لیے فنڈز جمع کرنے کے سلسلے میں ہورہا ہے جب کہ اس میچ کو انٹر نیشنل میچ کا درجہ دیا گیا ہے۔

شاہد آفریدی دو سال قبل بین الااقوامی کرکٹ سے ریٹائیرمنٹ حاصل کر چکے ہیں اور ان کی ٹی 20 کیریئر میں 97 وکٹیں ہین اور اگر آفریدی اس میچ میں 3 وکٹیں حاصل کرنے میں کامیاب ہو جاتے ہیں تو وہ بین الاقوامی ٹی200 میں 100 وکٹیں حاصل کرنے والے دنیا کے پہلے بولر بن جائیں گے۔