کامن ویلتھ گیمز، پاک-بھارت ٹاکرا کب ہوگا؟

برطانیہ کی سابقہ مقبوضات پر مشتمل کامن ویلتھ یعنی دولتِ مشترکہ کے گیمز ہر چار سال بعد کھیلے جاتے ہیں۔ اس سال ان کھیلوں کا آغاز بدھ 27 جولائی سے انگلینڈ کے شہر برمنگھم میں ہو رہا ہے اور تاریخ میں پہلی بار ویمنز کرکٹ کو گیمز کا حصہ بنایا گیا ہے۔

مینز کرکٹ پہلی اور آخری بار 1998ء کے کامن ویلتھ گیمز میں شامل کی گئی تھی۔ یہ وہ زمانہ تھا جب ٹی ٹوئنٹی کرکٹ ابھی ایجاد نہیں ہوئی تھی۔ یہی وجہ ہے کہ 50 اوورز پر مشتمل ایک ون ڈے ٹورنامنٹ ہوا تھا جس میں 16 ٹیموں نے شرکت کی تھی۔ پاکستان اور بھارت دونوں پہلے ہی راؤنڈ میں باہر ہو گئے جبکہ فائنل جنوبی افریقہ اور آسٹریلیا کے درمیان کھیلا گیا تھا۔

جنوبی افریقہ نے فائنل میں 4 وکٹوں سے کامیابی حاصل کر کے سونے کا تمغہ حاصل کیا تھا جبکہ آسٹریلیا کو چاندی اور نیوزی لینڈ کو کانسی کا تمغہ ملا تھا۔ جس نے تیسری پوزیشن کے مقابلے میں سری لنکا کو ہرایا تھا۔

بہرحال، اُس کے بعد سے اب پہلا موقع آیا ہے کہ کامن ویلتھ گیمز میں کرکٹ نظر آئے گی۔ البتہ یہ ویمنز کرکٹ ہوگی اور ٹی ٹوئنٹی یعنی 20 اوورز کے فارمیٹ میں ہوگی۔

پاکستان سمیت کُل آٹھ ممالک کی ویمنز ٹیمیں کامن ویلتھ گیمز میں شرکت کر رہی ہیں، جنہیں دو گروپوں میں تقسیم کیا گیا ہے۔ پاکستان، بھارت، آسٹریلیا اور بارباڈوس ایک گروپ میں ہیں، جبکہ انگلینڈ، جنوبی افریقہ، سری لنکا اور نیوزی لینڈ دوسرے میں۔

ہر گروپ کی ٹاپ 2 ٹیمیں سیمی فائنل میں پہنچیں گی، جہاں کامیابی حاصل کرنے والے فائنل کھیلیں گے جبکہ شکست خوردہ ٹیمیں کانسی کے تمغے کے لیے مقابل ہوں گی۔

گیمز میں ویمنز کرکٹ ایونٹ کا آغاز 29 جولائی کو آسٹریلیا اور بھارت کے مقابلے سے ہوگا لیکن سب سے اہم اور بڑا مقابلہ 31 جولائی کو ہوگا، جب پاکستان اور بھارت مقابل ہوں گے۔

کامن ویلتھ گیمز 2022ء: ویمنز کرکٹ ٹورنامنٹ کا شیڈول

مقابلہ		بمقابلہ	بمقام	بتاریخ
میچ 1	آسٹریلیا	بھارت	برمنگھم	‏29 جولائی 2022ء
میچ 2	پاکستان	بارباڈوس	برمنگھم	‏29 جولائی 2022ء
میچ 3	نیوزی لینڈ	جنوبی افریقہ	برمنگھم	‏30 جولائی 2022ء
میچ 4	انگلینڈ	سری لنکا	برمنگھم	‏30 جولائی 2022ء
میچ 5	پاکستان	بھارت	برمنگھم	‏31 جولائی 2022ء
میچ 6	آسٹریلیا	بارباڈوس	برمنگھم	‏31 جولائی 2022ء
میچ 7	انگلینڈ	جنوبی افریقہ	برمنگھم	‏2 اگست 2022ء
میچ 8	نیوزی لینڈ	سری لنکا	برمنگھم	‏2 اگست 2022ء
میچ 9	پاکستان	آسٹریلیا	برمنگھم	‏3 اگست 2022ء
میچ 10	بھارت	بارباڈوس	برمنگھم	‏3 اگست 2022ء
میچ 11	جنوبی افریقہ	سری لنکا	برمنگھم	‏4 اگست 2022ء
میچ 12	انگلینڈ	نیوزی لینڈ	برمنگھم	‏4 اگست 2022ء
پہلا سیمی فائنل	طے ہونا باقی	طے ہونا باقی	برمنگھم	‏6 اگست 2022ء
دوسرا سیمی فائنل	طے ہونا باقی	طے ہونا باقی	برمنگھم	‏6 اگست 2022ء
کانسی کا تمغہ	طے ہونا باقی	طے ہونا باقی	برمنگھم	‏7 اگست 2022ء
فائنل	طے ہونا باقی	طے ہونا باقی	برمنگھم	‏7 اگست 2022ء