ویمنز ورلڈ کپ، آسٹریلیا اور بھارت کی زبردست فتوحات

ویمنز ورلڈ کپ میں جنوبی افریقہ کی فتوحات کا سلسلہ بالآخر آسٹریلیا کے ہاتھوں رک گیا جس نے کپتان میگ لیننگ کی شاندار سنچری کی بدولت 272 رنز کا بہت بڑا ہدف بھی با آسانی حاصل کر لیا

دوسری جانب بھارت نے بنگلہ دیش کو بھاری شکست دے کر اپنی سیمی فائنل کھیلنے کی امیدوں کو زندہ رکھا ہوا ہے۔

ویلنگٹن میں کھیلے گئے مقابلے میں ٹاس آسٹریلیا نے جیتا اور پہلے جنوبی افریقہ کو کھیلنے کی دعوت دی۔ 88 رنز کی اوپننگ پارٹنرشپ نے آسٹریلیا کے فیصلے کو بڑی حد تک غلط ثابت کیا۔ یہ اِن فارم لورا وولفارٹ تھیں کہ جنہوں نے ایک مرتبہ پھر 50 کا ہندسہ عبور کیا بلکہ اس بار تو سنچری کے قریب بھی پہنچ گئیں لیکن اپنی چوتھی ون ڈے سنچری مکمل نہ کر پائیں۔

وولفارٹ 90 اور ان کے کچھ ہی دیر بعد کپتان سون لوس 52 رنز بنا کر آؤٹ ہو گئیں۔ دونوں نے تیسری وکٹ پر 91 رنز کا اضافہ کیا تھا۔ آخر میں مریزان کاپ کی تیز رفتار اننگز نے اسکور کو 271 رنز تک پہنچا دیا۔

جنوبی افریقہ نے آخری 4 اوورز میں 43 رنز کا اضافہ کیا تو لگتا تھا یہ میچ کا فیصلہ کن مرحلہ ثابت ہوگا۔ لیکن نہیں جناب! سامنا بھی آسٹریلیا سے تھا۔ جس نے 10 اوورز میں دونوں اوپنرز کھونے کے باوجود میچ پر لمحہ بھر کے لیے بھی گرفت ڈھیلی نہیں کی۔ خاص طور پر لیننگ کی کیپٹن اننگز نے تو کمال ہی کر دیا۔ 130 گیندوں پر 15 چوکوں اور 1 چھکے کے ساتھ وہ 135 رنز بنا کر وہ آخر تک ایک اینڈ سے ڈٹی رہیں۔ لوئر مڈل آرڈر میں تالیا میک گرا نے 32 اور ایشلی گارڈنر اور اینابیل سدرلینڈ نے 22، 22 رنز بناکر ان کا بھرپور ساتھ دیا۔ یہاں تک کہ 46 ویں اوور ہی میں آسٹریلیا نے ہدف حاصل کر لیا۔

15th ODI hundred for Meg Lanning!

What a brilliant innings 👏#CWC22 pic.twitter.com/4GAgbUn7WL

— ICC Cricket World Cup (@cricketworldcup) March 22, 2022

یہ آسٹریلیا کی موجودہ ورلڈ کپ میں مسلسل چھٹی کامیابی تھی اور وہ واحد ٹیم ہے جس نے ابھی تک کوئی میچ نہیں ہارا اور پہلے ہی سیمی فائنل میں پہنچ چکا ہے۔

جنوبی افریقہ کی شکست کا ایک سبب ان کی مایوس کن فیلڈنگ ہے۔ لیننگ کا ایک کیچ اس وقت چھوڑا گیا جب وہ صرف 7 رنز پر کھیل رہی تھیں اور اس کے علاوہ بھی چار مواقع ضائع کیے گئے۔

ویمنز ورلڈ کپ - میچ نمبر 21

آسٹریلیا بمقابلہ جنوبی افریقہ

نتیجہ: آسٹریلیا 5 وکٹوں سے جیت گیا

دوسری جانب ہیملٹن میں بھارت اوربنگلہ دیش کا مقابلہ تھا جس میں بھارت نے با آسانی 110 رنز سے کامیابی حاصل کی۔ پہلے بلے بازی کرتے ہوئے بھارت نے افتتاحی جوڑی نے 74 رنز بنائے لیکن یہی نمبر تھا جس پر اس کی تین وکٹیں گر گئیں۔ سمرتی مندھانا 30، شفالی ورما 42 اور کپتان مٹھالی راج پہلی ہی گیند پر صفر!

یہاں پر یاستیکا بھاٹیا نے ایک اینڈ مکمل طور پر سنبھال لیا اور 80 گیندوں پر 50 رنز کی ذمہ دارانہ اننگز کھیلی۔ لوئر مڈل آرڈر میں وکٹ کیپر ریچا گھوش، پوجا وستراکر اور سنے رانا نے کارآمد اننگز کھیلی اور بھارت کو 229 رنز تک پہنچنے میں اہم کردار ادا کیا۔

بھارت نے آخری 7 اوورز میں 53 قیمتی رنز کا اضافہ کیا۔

‏230 رنز دیکھنے میں تو اتنا بڑا ہدف نہیں لگتا تھا لیکن بنگلہ دیشی بلے بازوں کے لیے یہ ہمالیہ جیسا ہدف ثابت ہوا۔ ٹاپ پانچ بلے بازوں میں سے صرف مرشدہ خاتون کی اننگز ہی دہرے ہندسے میں گئی۔ باقی کوئی 5 رنز سے آگے بھی نہ بڑھ پائیں۔ شرمین اختر 5، فرغانہ حق صفر، کپتان نگار سلطانہ 3 اور رومانہ احمد صرف 2۔ کہانی تو 35 رنز پر پانچ وکٹیں گرنے کے بعد ہی ختم ہو گئی تھی۔ اس کے بعد بس خانہ پُری ہی ہوئی۔ 41 ویں اوور میں بنگلہ دیش کی پوری ٹیم 119 رنز پر ڈھیر ہو گئی اور یوں 110 رنز کی شکست کھائی۔

بھارت کی جانب سے سنے رانا نے صرف 30 رنز دے کر 4 وکٹیں لیں جبکہ دو، دو کھلاڑیوں کو جھولن گوسوامی اور پوجا وستراکر نے آؤٹ کیا۔

ویمنز ورلڈ کپ - میچ نمبر 22

بھارت بمقابلہ بنگلہ دیش

نتیجہ: بھارت 110 رنز سے جیت گیا

اس بڑی کامیابی کی بدولت بھارت پوائنٹس ٹیبل پر تیسرے نمبر پر آ گیا ہے اور اس کے سیمی فائنل کے امکانات بھی روشن ہو گئے ہیں کیونکہ 110 رنز کی فتح نے اس کے نیٹ رن ریٹ کو خوب فائدہ پہنچایا ہے۔

ویمنز ورلڈ کپ 2022ء - پوائنٹس ٹیبل

	میچز	جیتے	ہارے	پوائنٹس	نیٹ رن ریٹ
آسٹریلیا	6	6	0	12	1.287
جنوبی افریقہ	5	4	1	8	0.092
بھارت	6	3	3	6	0.768
ویسٹ انڈیز	6	3	3	6	‎-0.885
انگلینڈ	5	2	3	4	0.327
نیوزی لینڈ	6	2	4	4	‎-0.229
بنگلہ دیش	5	1	4	2	‎-0.754
پاکستان	5	1	4	2	‎-0.878