میک کولم انگلینڈ ٹیسٹ کوچ بن گئے

0 366

جب 2019ء میں مصباح الحق کو پاکستان کا ہیڈ کوچ بنایا گیا تھا تو آپ کو یاد ہوگا کہ بڑا ہنگامہ کھڑا ہوا تھا۔  کسی اور کا کیا کہیں کہ ہم خود اسی صف میں تھے کہ مصباح کیونکہ کوچنگ کا تجربہ نہیں رکھتے، اس لیے انہیں اتنی بھاری ذمہ داری قبول نہیں کرنی چاہیے۔ بہرحال، اب لگتا ہے مصباح والا یہ تجربہ گوروں کو پسند آ گیا ہے۔ انگلینڈ نے نیوزی لینڈ کے سابق کپتان برینڈن میک کولم کو اپنی ٹیسٹ ٹیم کا ہیڈ کوچ بنانے کا اعلان کر دیا ہے، وہ بھی پورے چار سال کے لیے۔

مصباح الحق کی طرح میک کولم بھی ٹیسٹ تو درکنار، کبھی کسی فرسٹ کلاس ٹیم کے بھی کوچ نہیں رہے۔ البتہ وہ تین سال سے انڈین پریمیئر لیگ کی ٹیم کلکتہ نائٹ رائیڈرز کے کوچ ضرور ہیں۔ وہی کلکتہ کے جس کے ایک ہیڈ کوچ ٹریور بیلس بھی انگلینڈ کی کوچنگ کر چکے ہیں اور اب وہیں سے میک کولم بھی آ رہے ہیں۔ لگتا ہے کلکتہ لندن سے بہت قریب ہے 🙂

خیر، برینڈن میک کولم نیوزی لینڈ کے ایک تجربہ کار اور کامیاب کپتان رہے ہیں۔ 101 ٹیسٹ میچز کھیلنے کے بعد انہوں نے 2016ء میں اچانک ریٹائرمنٹ کا اعلان کر دیا۔ اس دوران انہوں نے 31 ٹیسٹ میں نیوزی لینڈ کی قیادت بھی کی اور اسے بین الاقوامی منظرنامے پر ایک اہم ٹیم بنانے میں بنیادی کردار ادا کیا۔

برینڈن میک کولم کا انٹرنیشنل کیریئر

فارمیٹمیچزرنزبہترین اننگزاوسط10050
ٹیسٹ 101645330238.641231
ون ڈے انٹرنیشنل260608316630.41532
ٹی ٹوئنٹی انٹرنیشنل71214012335.66213
فرسٹ کلاس150921030237.131746
لسٹ اے309737317030.84937
ٹی ٹوئنٹی3709922158*29.97755

اب وہ ایک ایسے مرحلے پر انگلینڈ کی کوچنگ سنبھالیں گے جب ٹیم انگلینڈ شکست کی دلدل میں پھنسی ہوئی ہے۔ گزشتہ 17 ٹیسٹ میچز میں صرف ایک کامیابی اور ایشیز اور دورۂ ویسٹ انڈیز میں بد ترین ناکامیوں نے نہ صرف جو روٹ کی کپتانی بلکہ ڈائریکٹر سے لے کر ہیڈ کوچ تک سب کا خاتمہ کر دیا ہے۔ اب بین اسٹوکس نئے ٹیسٹ کپتان ہیں اور ان کا پہلا امتحان ہوگا 2 جون کو نیوزی لینڈ کے خلاف ٹیسٹ سیریز۔

غالباً اس میچ سے پہلے ہی میک کولم بھارت سے انگلینڈ پہنچ جائیں گے۔

واضح رہے کہ پہلے سمجھا جا رہا تھا کہ میک کولم کو اپنے مزاج اور انداز کی بدولت انگلینڈ کی محدود اوورز کی ٹیم کا کوچ بنایا جائے گا، یعنی ون ڈے اور ٹی ٹوئنٹی کا۔ لیکن انہوں نے ٹیسٹ ٹیم کی کوچنگ کی خواہش ظاہر کی اور انگلینڈ سے اس سے اتفاق بھی کر لیا۔

اب دیکھتے ہیں کہ اسٹوکس اور میک کولم کی کیمسٹری کس طرح کام کرتی ہے؟