[ریکارڈز] پاکستان کے لیے سب سے زیادہ ٹیسٹ چھکے

0 1,016

پاکستان اور انگلستان کا دوسرا ٹیسٹ مقابلہ دبئی کے خوبصورت انٹرنیشنل کرکٹ اسٹیڈیم میں جاری ہے۔ پاکستان اپنی پہلی اننگز میں 378 رنز بنا سکا ہے اور یہاں تک پہنچنے میں سب سے اہم کردار مصباح الحق کی قائدانہ اننگز کا رہا، جنہوں نے 102 رنز کی اننگز کھیلی جس میں 8 چوکوں کے ساتھ پورے 5 چھکے شامل رہے۔ گو کہ ابھی مقابلہ کسی ایک حریف کے حق میں جھکتا نہیں دکھائی دے رہا لیکن اگر پاکستان غلبہ حاصل کرنے میں کامیاب رہا اور مقابلہ بھی جیت گیا تو مصباح کی اس اننگز کا کردار بنیادی نوعیت کا ہوگا۔

60 واں ٹیسٹ کھیلنے والے مصباح کے کیریئر کی یہ نویں سنچری تھی۔ وہ 197 گیندوں پر 102 رنز بنانے کے بعد دوسرے دن صبح کے پہلے اوور میں آؤٹ ہوئے لیکن اس سے پہلے پاکستان کے لیے چند ایسے ریکارڈ حاصل کرگئے، جن کے بارے میں عام آدمی تصور نہیں کرسکتا کہ یہ بھی مصباح کے پاس ہوں گے۔ جیسا کہ ملک کے لیے ٹیسٹ کرکٹ میں سب سے زیادہ چھکوں کا ریکارڈ۔

misbah-ul-haq

جب پہلے دن کے آخری اوور میں مصباح نے چھکے کے ذریعے اپنی سنچری مکمل کی تو یہ ان کے کیریئر کا 60 واں چھکا تھا۔ یوں انہوں نے یونس خان کا 60 چھکوں کا ریکارڈ برابر کردیا ہے۔ کیونکہ دونوں کھلاڑی اس وقت کھیل رہے ہیں اس لیے یہاں رسہ کشی عرصے تک جاری رہنے کا امکان ہے۔ ان دونوں کے بعد پاکستان کے لیے سب سے زیادہ ٹیسٹ چھکوں کا اعزاز وسیم اکرم کے پاس تھا۔ جنہوں نے 57 چھکے لگائے تھے جبکہ عمران خان نے اپنے 88 مقابلوں کے کیریئر میں 55 چھکے اسکور کیے تھے۔ شاہد آفریدی نے اپنے 27 ٹیسٹ میچز کے معمولی دور میں 52 چھکے لگائے تھے اور بلاشبہ اگر وہ ٹیسٹ کرکٹ جاری رکھتے تو آج اس میدان میں ان کا کوئی مقابل نہ ہوتا۔

سب سے زیادہ ٹیسٹ چھکے لگانے والے پاکستانی بلے باز

بلے باز ملک مقابلے رنز بہترین اننگز اوسط سنچریاں نصف سنچریاں چوکے چھکے
مصباح الحق پاکستان 60 4156 161* 48.32 9 30 421 60
یونس خان پاکستان 103 8953 313 53.93 30 30 964 60
وسیم اکرم پاکستان 104 2898 257* 22.64 3 7 324 57
عمران خان پاکستان 88 3807 136 37.69 6 18 316 55
شاہد آفریدی پاکستان 27 1716 156 36.51 5 8 220 52

ویسے ٹیسٹ میں سب سے زیادہ چھکوں کا ریکارڈ آسٹریلیا کے عظیم وکٹ کیپر ایڈم گلکرسٹ کے پاس ہے۔ وہ تاریخ کے واحد کھلاڑی ہیں جنہوں نے کیریئر میں 100 چھکے لگا رکھے ہیں۔ 96 ٹیسٹ میں 47.60 کے واسط سے ساڑھے پانچ ہزار سے زیادہ رنز اور 677 چوکوں کے ساتھ پورے 100 چھکے، ایسا زبردست وکٹ کیپر شاید دنیا کی کسی دوسری ٹیم کو نصیب نہ ہو۔ ویسے کرس گیل ہوسکتا ہے یہ ریکارڈ توڑیں، اگر وہ ویسٹ انڈیز کے لیے ٹیسٹ کرکٹ کھیلتے رہے۔ ورنہ بلاشبہ نیوزی لینڈ کے برینڈن میک کولم اس مقام تک پہنچیں گے جو اب تک 95 چھکے لگا چکے ہیں۔

سب سے زیادہ ٹیسٹ چھکے لگانے والے بلے باز

بلے باز ملک مقابلے رنز بہترین اننگز اوسط سنچریاں نصف سنچریاں چوکے چھکے
ایڈم گلکرسٹ آسٹریلیا 96 5570 204* 47.60 17 26 677 100
کرس گیل ویسٹ انڈیز 103 7214 333 42.18 15 37 1046 98
ژاک کیلس جنوبی افریقہ 166 13289 224 55.37 45 58 1488 97
برینڈن میک کولم نیوزی لینڈ 94 6008 302 38.76 11 29 716 95
وریندر سہواگ بھارت 104 8586 319 49.34 23 32 1233 91