ویسٹ انڈیز زوال کی انتہا پر، بنگلہ دیش کے ہاتھوں ایک اور سیریز شکست

ٹیسٹ اور ٹی ٹوئنٹی میں چاہے بنگلہ دیش کا حال جتنا بھی بُرا رہا ہو، لیکن ون ڈے انٹرنیشنل میں بنگال کے شیروں کا مقابلہ کرنا ویسٹ انڈیز کے بس کی بات نہیں لگتی۔ گزشتہ چار سال سے ویسٹ انڈیز بنگلہ دیش سے ون ڈے سیریز ہار رہا ہے اور پروویڈنس، گیانا میں بھی یہی تاریخ دہرائی گئی۔ سیریز کے ایک اہم مقابلے میں جتنی اچھی کارکردگی کی توقع تھی، ویسٹ انڈین بلے بازوں نے اتنی ہی بھیانک پرفارمنس دی۔ صرف 108 رنز پر ڈھیر ہو گئے۔ یعنی بنگلہ دیش کے خلاف ہوم گراؤنڈ پر اپنے سب سے کم اسکور پر۔

بنگلہ دیش کا دورۂ ویسٹ انڈیز 2022ء - دوسرا ون ڈے انٹرنیشنل

ویسٹ انڈیز بمقابلہ بنگلہ دیش

‏13 جولائی 2022ء

پروویڈنس اسٹیڈیم، گیانا

بنگلہ دیش 9 وکٹوں جیت گیا

یہاں بنگلہ دیش نے ٹاس جیت کر پہلے خود باؤلنگ کرنے کا فیصلہ کیا۔ ویسٹ انڈیز کو میدان میں اترتے ہی اندازہ ہو گیا کہ آج بیٹنگ کے لیے ایک مشکل دن ہے اور اس کے گرد اسپن جال بُنا جائے گا۔ یہی وجہ ہے کہ اوپنرز وکٹ بچانے میں جتے رہے اور رنز بنانے کی طرف دھیان ہی نہیں دیا۔ شے ہوپ اور کائل میئرس نے 27 رنز کا آغاز فراہم کیا لیکن اس کے لیے 11 اوورز کھیل گئے۔

اپنے خول میں بند ہو جانے کا انجام یہ نکلا کہ بالآخر وکٹ گری اور پھر ایک نہ رکنے والا سلسلہ شروع ہو گیا۔ سب سے پہلے میئرس آؤٹ ہوئے، جنہوں نے 36 گیندوں پر صرف 17 رنز بنائے۔ پھر شیمار بروکس 13 گیندوں پر محض پانچ رنز بنا کر نسوم احمد کا پہلا شکار بنے، جو آج کے میچ کے ہیرو تھے۔

نسوم نے وہ اوور پھینکا، جو میچ میں ٹرننگ پوائنٹ ثابت ہوا۔ یہ اننگز کا اٹھارہواں اوور تھا جس میں انہوں نے شے ہوپ اور نکولس پورَن کو دو مسلسل گیندوں پر آؤٹ کر کے تہلکہ مچا دیا۔

اس کے بعد آنے والے بلے بازوں میں صرف کیمو پال کے 25 رنز ہی قابل ذکر ہیں۔ روومین پال کے سوا تو کوئی دہرے ہندسے میں بھی داخل نہیں ہو پایا۔ 35 واں اوور ویسٹ انڈین اننگز کے خاتمے کے ساتھ مکمل ہوا، وہ بھی صرف 108 رنز پر!

نسوم احمد نے تین قیمتی وکٹیں ضرور لیں، لیکن زیادہ وکٹیں مہدی حسن نے حاصل کیں۔ انہوں نے 29 رنز دے کر چار کھلاڑیوں کو آؤٹ کیا۔

اب میچ اور ساتھ ہی سیریز جیتنے کے لیے بنگلہ دیش کے سامنے ایک آسان ہدف تھا۔ اوپنرز کی 12 اوورز میں 48 رنز کی شراکت داری نے اسے مزید آسان کر دیا۔ بنگلہ دیش 21 ویں اوور میں صرف ایک وکٹ کے نقصان پر ہی ہدف تک پہنچ گیا۔ گرنے والی واحد وکٹ نجم الحسن کی تھی، جنہوں نے 20 رنز بنائے۔ کپتان تمیم اقبال نصف سنچری اور لٹن داس 27 رنز کے ساتھ ناقابلِ شکست میدان سے واپس آئے۔

Cricket team celebrates victory of ODI series.#BCB #Cricket #WIvBAN pic.twitter.com/ZQiiZFZosP

— Bangladesh Cricket (@BCBtigers) July 13, 2022

یہ مسلسل دسواں ون ڈے انٹرنیشنل تھا، جس میں بنگلہ دیش نے ویسٹ انڈیز کے خلاف کامیابی حاصل کی۔ دسمبر 2018ء میں ہوم سیریز کے فیصلہ کن میچ میں کامیابی کے بعد سے آج تک بنگلہ دیش ویسٹ انڈیز سے کوئی ون ڈے نہیں ہارا اور آج کی کامیابی کے ساتھ ان فتوحات کی تعداد 10 ہو چکی ہے۔

یہی نہیں جولائی 2018ء سے اب تک ہونے والی تمام چاروں ون ڈے سیریز بھی بنگلہ دیش ہی جیتا ہے۔ اُس سال ویسٹ انڈیز کے دورے میں اور پھر میزبانی کرتے ہوئے، بعد ازاں جنوری 2021ء میں ہوم سیریز میں ‏3-0 سے کلین سوئپ اور اب جاری سیریز، سب میں فتح بنگلہ دیش کی جھولی میں گری ہے۔

گزشتہ 10 سال میں بنگلہ دیش-ویسٹ انڈیز باہمی ون ڈے سیریز

	بمقابلہ	میچز	فتوحات	شکست	بتاریخ
بنگلہ دیش 🏆	ویسٹ انڈیز	2	2	0	جولائی 2022ء
بنگلہ دیش 🏆	ویسٹ انڈیز	3	3	0	جنوری 2021ء
بنگلہ دیش 🏆	ویسٹ انڈیز	3	2	1	دسمبر 2018ء
بنگلہ دیش 🏆	ویسٹ انڈیز	3	2	1	جولائی 2018ء
بنگلہ دیش 🏆	ویسٹ انڈیز	3	0	3	اگست 2014ء
بنگلہ دیش 🏆	ویسٹ انڈیز	5	3	2	نومبر 2012ء

ویسٹ انڈیز نے آخری مرتبہ بنگلہ دیش کو کسی باہمی ون ڈے سیریز میں شکست 2014ء میں دی تھی۔ گزشتہ 10 سال میں ویسٹ انڈیز بنگلہ دیش کے خلاف صرف ایک مرتبہ 2014ء میں ہوم سیریز ہی جیت پایا ہے، باقی 'ہوم' ہو یا 'اوے' سیریز، شکست ویسٹ انڈیز کا مقدر ٹھیری ہے۔

بنگلہ دیش نے حال ہی میں سری لنکا، زمبابوے، افغانستان اور پھر جنوبی افریقہ کے خلاف جنوبی افریقہ میں تاریخی ون ڈے سیریز جیتی تھیں، یعنی یہ اس کی مسلسل پانچویں سیریز ہے۔ یہی وجہ ہے کہ بنگلہ دیش کرکٹ ورلڈ کپ سپر لیگ میں پوائنٹس ٹیبل میں دوسرے نمبر پر ہے۔

آئی سی سی کرکٹ ورلڈ کپ سپر لیگ ٹیبل

بمطابق 12 جولائی 2022ء

درجہ	ملک	میچز	جیتے	ہارے	پوائنٹس	نیٹ رن ریٹ
1	انگلینڈ	18	12	5	125	‎+1.219
2	بنگلہ دیش	18	12	6	120	‎+0.384
3	افغانستان	12	10	2	100	‎+0.563
4	پاکستان	15	9	6	90	‎+0.095
5	نیوزی لینڈ	8	8	0	80	‎+1.827
6	ویسٹ انڈیز	21	8	13	80	‎-0.823
7	بھارت	12	8	4	79	‎+0.416
8	آسٹریلیا	12	7	5	70	‎+0.496
9	آئرلینڈ	20	6	12	68	‎-0.399
10	سری لنکا	18	6	11	62	‎-0.031
11	جنوبی افریقہ	13	4	7	49	‎-0.206
12	زمبابوے	15	3	11	35	‎-0.924
13	نیدرلینڈز	16	2	13	25	‎-1.240

بہرحال، سیریز کا تیسرا اور آخری ون ڈے 16 جولائی کو پروویڈنس ہی میں کھیلا جائے گا۔ یہاں فیصلہ ہوگا کہ بنگلہ دیش کلین سوئپ کر پائے گا یا نہیں۔