ایک ایسا ریکارڈ جو کبھی نہیں ٹوٹے گا

کرکٹ کے کچھ ریکارڈز ایسے ہیں جو ہمیشہ قائم رہیں گے، کبھی نہیں ٹوٹیں گے، بلکہ ٹوٹ ہی نہیں سکتے، الّا یہ کہ قانون میں کوئی بنیادی نوعیت کی تبدیلی کر دی جائے۔ گزشتہ روز ایک ایسے ہی ریکارڈ کا دن تھا۔ 1956ء میں 31 جولائی کے دن انگلینڈ کے جم لیکر نے ایک ایسا ریکارڈ بنایا جو شاید ہی کوئی توڑ پائے اور دوسرا ایسا جو کبھی کوئی نہیں توڑ سکتا۔ ایک تھا میچ میں 19 وکٹیں لینے کا اور دوسرا اننگز میں تمام 10 کھلاڑیوں کو آؤٹ کرنے کا۔

یہ اولڈ ٹریفرڈ، مانچسٹر میں کھیلا گیا ایشیز 1956ء کا چوتھا ٹیسٹ تھا۔ ایک انتہائی یکطرفہ مقابلہ جو جم لیکر کی ناقابلِ یقین باؤلنگ کی وجہ سے ہمیشہ یاد رکھا جائے گا۔ بس افسوس یہ رہے گا کہ میچ میں ایک وکٹ، صرف ایک وکٹ ان کے ہاتھ نہ چڑھ سکی یعنی یہ ریکارڈ پرفیکٹ '20 آؤٹ آف 20' نہ بن سکا۔ بالکل اسی طرح جیسے ڈان بریڈمین 100 رنز کا بیٹنگ اوسط حاصل نہیں کر پائے تھے۔ لیکن ان دونوں ریکارڈز کی خوبصورتی یہی ہے، ایک طرف 19 وکٹیں اور دوسری جانب 99.94 کا بیٹنگ ایوریج۔

اس ٹیسٹ میں جم لیکر کو صرف ایک وکٹ نہیں ملی تھی، حریف بیٹسمین ٹونی لاک کی۔ میچ کی پہلی اننگز میں لیکر نے 37 رنز دے کر 9 وکٹیں لی تھیں۔ ان میں سے 7 انہوں نے آخری 22 گیندوں پر حاصل کی تھیں اور کرکٹ تاریخ کی بہترین اننگز باؤلنگ پرفارمنس دی۔ لیکن غم تھا کہ تمام وکٹیں کیوں نہ ملیں؟ اس خواہش کی تکمیل ہوئی میچ کی اگلی ہی اننگز میں جس میں انہوں نے تمام 10 آسٹریلوی بلے بازوں کو آؤٹ کیا۔ یہ تمام وکٹیں انہوں نے صرف 53 رنز دے کر حاصل کی تھیں اور ایک ایسا ریکارڈ بنایا، جو کبھی ٹوٹ نہیں سکتا۔

آج بھی یہ ٹیسٹ کرکٹ تاریخ کی بہترین باؤلنگ ہے۔ بلکہ میچ میں 19 وکٹیں حاصل کر کے بہترین باؤلنگ کا جو ریکارڈ بنایا، وہ بھی ایسا ہے جو ٹوٹتا نظر نہیں آتا۔

ویسے بھارت کے انیل کمبلے نے 1999ء میں پاکستان کے خلاف دلّی ٹیسٹ میں 10 وکٹیں حاصل کر کے اننگز والا ریکارڈ تو برابر کر دیا تھا۔ ہم وطن امپائروں کی مدد سے انیل نے بھارت کو میچ جتوانے اور سیریز برابر کروانے میں اہم کردار ادا کیا۔ پھر دسمبر 2021ء میں نیوزی لینڈ کے اعجاز پٹیل نے بھارت کے خلاف ممبئی کے وانکھیڑے اسٹیڈیم میں 119 رنز دے کر بھارت کی تمام 10 وکٹیں ہتھیا لیں۔ لیکن سیدھی سی بات ہے، یہ ریکارڈ توڑ نہیں سکتے، صرف برابر ہی کر سکتے ہیں۔

ٹیسٹ: اننگز میں بہترین باؤلنگ کا ریکارڈ

نام	اوورز	میڈنز	رنز	وکٹیں	بمقابلہ	میدان	تاریخ
جم لیکر	51.2	23	53	10	آسٹریلیا	مانچسٹر	جولائی 1956ء
انیل کمبلے	26.3	9	74	10	پاکستان	دلّی	فروری 1999ء
اعجاز پٹیل	47.5	12	119	10	بھارت	ممبئی	دسمبر 2021ء
جارج لومین	14.2	6	28	9	جنوبی افریقہ	جوہانسبرگ	مارچ 1896ء
جم لیکر	16.4	4	37	9	آسٹریلیا	مانچسٹر	جولائی 1956ء
مرلی دھرن	40.0	19	51	9	زمبابوے	کانڈی	جنوری 2002ء
رچرڈ ہیڈلی	23.4	4	52	9	آسٹریلیا	برسبین	نومبر 1985ء
عبد القادر	37.0	13	56	9	انگلینڈ	لاہور	نومبر 1987ء
ڈیون میلکم	16.3	2	57	9	جنوبی افریقہ	اوول	اگست 1994ء
مرلی دھرن	54.2	27	65	9	انگلینڈ	اوول	اگست 1998ء

میچ میں 19 وکٹوں کے ریکارڈ کو تو آج تک کوئی خطرہ لاحق نہیں ہوا۔ جم لیکر کے بعد بہترین باؤلنگ 136 رنز دے کر 16 وکٹیں ہے جو بھارت کے نریندر ہروانی نے 1988ء میں اپنے پہلے ہی ٹیسٹ میں کی تھی۔ دوسرا کوئی باؤلر بھی میچ میں 16 سے زیادہ وکٹیں حاصل نہیں کر پایا۔

ٹیسٹ: میچ میں بہترین باؤلنگ کا ریکارڈ

نام	اوورز	میڈنز	رنز	وکٹیں	بمقابلہ	میدان	تاریخ
جم لیکر	68.0	27	90	19	آسٹریلیا	مانچسٹر	جولائی 1956ء
سڈنی بارنیس	65.3	16	159	17	جنوبی افریقہ	جوہانسبرگ	دسمبر 1913ء
نریندر ہروانی	33.5	6	136	16	ویسٹ انڈیز	مدراس	جنوری 1988ء
باب میسی	60.1	16	137	16	انگلینڈ	لارڈز	جون 1972ء
متیاہ مرلی دھرن	113.5	41	220	16	انگلینڈ	اوول	اگست 1998ء
جونی برگس	33.3	16	28	15	جنوبی افریقہ	کیپ ٹاؤن	مارچ 1889ء
جارج لومین	25.3	11	45	15	جنوبی افریقہ	پورٹ ایلزبتھ	فروری 1896ء
چارلی بلائتھ	38.3	10	99	15	جنوبی افریقہ	لیڈز	جولائی 1907ء
ہیڈلی ویرٹی	58.3	23	104	15	آسٹریلیا	لارڈز	جون 1934ء
رچرڈ ہیڈلی	52.3	13	123	15	آسٹریلیا	برسبین	نومبر 1985ء

جم لیکر نے انگلینڈ کے لیے کُل 46 ٹیسٹ میچز کھیلے اور 21.24 کے اوسط سے 193 وکٹیں حاصل کیں۔ انہوں نے اپنے کیریئر میں تین بار میچ میں 10 وکٹیں اور 9 مرتبہ اننگز میں پانچ وکٹیں لینے کے کارنامے انجام دیے۔

جم لیکر کے کیریئر پر ایک نظر

فارمیٹ	میچز	وکٹیں	بہترین باؤلنگ	اوسط	‏5 وکٹیں	‏10 وکٹیں
ٹیسٹ	46	193	10-53	21.24	‏9 مرتبہ	‏3 مرتبہ
فرسٹ کلاس	450	1944	10-53	18.41	‏127 مرتبہ	‏32 مرتبہ