چھ سال میں پہلی بار، کوہلی ٹاپ 10 سے باہر

پے در پے ناکامیوں نے بھارت کے ویراٹ کوہلی کو تقریباً چھ سال بعد دنیا کے ٹاپ 10 بلے بازوں کی فہرست سے باہر کر دیا ہے۔

انگلینڈ اور بھارت کے درمیان پٹودی ٹرافی کے آخری ٹیسٹ کے بعد جاری ہونے والی رینکنگ کے مطابق کوہلی تین درجے تنزلی کے ساتھ 13 ویں نمبر پر چلے گئے ہیں۔ یہ نومبر 2016ء کے بعد پہلا موقع ہے کہ کوہلی دنیا کے 10 بہترین ٹیسٹ بلے بازوں کی فہرست کا حصہ نہیں۔

ایجبسٹن، برمنگھم میں کھیلے گئے اس ٹیسٹ میں کوہلی دونوں اننگز میں کُل ملا کر 31 رنز ہی بنا پائے۔ لیکن یہ اُن کی مایوس کن کارکردگی کی صرف ایک جھلک ہے۔ حقیقت یہ ہے کہ وہ گزشتہ تین سال سے ایک سنچری تک نہیں بنا پائے۔ 2022ء میں انہوں نے 7 اننگز میں 31.42 کے اوسط سے محض 220 رنز بنائے ہیں۔ 2020ء اور 2021ء میں بھی کارکردگی کوہلی کے شایانِ شان نہیں تھی، جس کا نتیجہ بہرحال یہی نکلنا تھا۔

ویراٹ کوہلی، سال بہ سال

سال	میچز	رنز	بہترین اننگز	اوسط	100	50
‏2011ء	5	202	63	22.44	0	2
‏2012ء	9	689	116	49.21	3	3
‏2013ء	8	616	119	56.00	2	3
‏2014ء	10	847	169	44.57	4	2
‏2015ء	9	640	147	42.66	2	2
‏2016ء	12	1215	235	75.93	4	2
‏2017ء	10	1059	243	75.64	5	1
‏2018ء	13	1322	153	55.08	5	5
‏2019ء	8	612	254*	68.00	2	2
‏2020ء	3	116	74	19.33	0	1
‏2021ء	11	536	72	28.21	0	4
‏2022ء	4	220	79	31.42	0	1

دوسری جانب پے در پے سنچریاں جونی بیئرسٹو کو ٹاپ 10 بلے بازوں کی فہرست میں واپس لے آئی ہیں۔ تین ٹیسٹ میچز میں چار سنچریاں بنانے والے بیئرسٹو نے برمنگھم میں 114 رنز کی فاتحانہ اننگز کھیلی۔ جس کی بدولت وہ 11 درجے ترقی کے ساتھ ٹیسٹ بلے بازوں میں 10 واں مقام حاصل کرنے میں کامیاب ہو گئے ہیں۔

32 سالہ بیئرسٹو اس وقت اپنے کیریئر کی بہترین فارم میں ہیں۔ بھارت کے خلاف آخری ٹیسٹ کی دونوں اننگز میں سنچریاں بنانے سے پہلے وہ نیوزی لینڈ کے خلاف بھی آخری دونوں ٹیسٹ میچز میں تہرے ہندسے کی اننگز کھیل چکے تھے۔ اِس سیریز سے پہلے وہ 541 پوائنٹس کے ساتھ 47 ویں نمبر پر تھے، لیکن چار میچز میں چار سنچریاں انہیں 2018ء کے بعد پہلی بار ٹاپ 10 میں لے آئی ہیں۔

The sound off @jbairstow21's bat this summer 💥

Every boundary from his season so far 🔥 pic.twitter.com/9fab0d5Ppt

— England Cricket (@englandcricket) July 5, 2022

دوسری جانب بھارت کے لیے عمدہ کارکردگی دِکھانے والے رشبھ پنت بھی ٹاپ 10 بلے بازوں میں آ گئے ہیں۔ انہوں نے برمنگھم میں پہلی اننگز میں 111 گیندوں پر 146 رنز کی شاندار اننگز کھیلی۔ پھر دوسری اننگز میں مزید 57 رنز جوڑے۔ یوں وہ گزشتہ چھ ٹیسٹ میچز میں دو سنچریاں اور تین نصف سنچریاں بنا چکے ہیں، جن کی بدولت پنت چھ درجے پھلانگ کر نمبر پانچ پر آ گئے ہیں، جو اُن کے کیریئر کی بہترین پوزیشن ہے۔

پھر فاتحِ عالم جو روٹ ہیں، جن کی ایک اور فاتحانہ سنچری نے انہیں کیریئر بیسٹ ریٹنگ 923 پر پہنچا دیا ہے۔ برمنگھم میں ریکارڈ 'رن چَیز' میں انہوں نے 142 رنز ناٹ آؤٹ بنائے تھے۔ یوں روٹ نے نہ صرف اپنے قریبی ترین حریف آسٹریلیا کے مارنس لبوشین پر برتری میں مزید اضافہ کر لیا ہے، بلکہ وہ ریٹنگ پوائنٹس کے لحاظ سے کرکٹ تاریخ کے ٹاپ 20 بلے بازوں میں بھی شامل ہو گئے ہیں۔

مارنس لبوشین کے بعد تیسرے نمبر پر آسٹریلیا ہی کے اسٹیو اسمتھ ہیں جبکہ پاکستانی کپتان بابر اعظم چوتھے نمبر پر موجود ہیں۔

ٹیسٹ کی انفرادی عالمی درجہ بندی

بمطابق 6 جولائی 2022ء